ثورة الغضب الثانية … يناير 2012

12 يناير, 2012

وكأن الأيام هي هي ولم تتغير …

منذ عام كانت الدعوات منتشرة للخروج الى الشارع من أجل الإعتراض .. الإعتراض فقط … ولم تكن كلمة ثورة تخطر على بال أحد من البسطاء أمثالي …

اليوم … نفس الجهات تدعو الى نفس الأمر … لكنها دعوات واضحة الى الثورة … ومش أي ثورة .. دي ثورة مقرونة بالغضب ….

 

السنة اللي فاتت … انقلب الإعتراض إلى ثورة … وتم خلْع رأس النظام ….

ياترى … الثورة السنة دي … هتبقى اييييييييييييييه؟؟؟؟

 

ربنا يستر عليكي يابلدي

عيد أضحى سعيد … 1432 هـ … 2011 م

6 نوفمبر, 2011

كل عام وأنتم بخير …. كل عام والأمة الإسلامية أقوى وعلى قلب رجل واحد …

كل عام ومصر الحبيبة أفضل حالا واستقرارا …. وسعادة

دعاء الاستخارة

9 أكتوبر, 2011

اللهم إني أستخيرك بعلمك ، واستقدرك بقدرتك ، وأسألك من فضلك العظيم ، فإنك تقدر ولا أقدر ، وتعلم ولا أعلم ، وأنت علام الغيوب .

اللهم إن كنت تعلم أن هذا الأمر خير لي في ديني ومعاشي وعاقبة أمري فاقدره لي ، ويسره لي ، ثم بارك لي فيه .

وإن كنت تعلم أن هذا الأمر شر لي في ديني ومعاشي وعاقبة أمري عاجله وآجله فاصرفه عني واصرفني عنه ،

واقدر لي الخير حيث كان ثم أرضني به

مدرستي بتفتح بدري

1 أكتوبر, 2011

تحدثت عن حياتي ماقبل الانتقال الى سكن المستشفى العسكري … وعن بداية التحاقي بسنوات الدراسة عام 1979م. وانتقلنا في نفس الوقت الى سكن المستشفى العسكري … 

افتكرت ان المحاولات كانت حثيثة علشان ادخل المدرسة السنة اللي فاتت .. عام 1978م .. زي ماحصل مع اخواتي … واذكر اني رحت مرة مع أبويا للمدرسة علشان التقديم … لكن لم تتم الحكاية لأن أبي وقبيل وقت دخول المدارس احتاج الى عملية استئصال للمرارة … دخل فيها المستشفى وطبعا ماكنش دخولي المدرسة في الحالة دي على قائمة الأولويات .. 

بعد نهاية سنتي الدراسية الأولى … كان القرار بأن انتقل الى مدرسة أبي بن كعب لتحفيظ القرآن الكريم … مقرها حي المنتزه في الرياض … نقلة نوعية … أسوأ مافيها اني بقيت لوحدي … ومافيش ضياء معايا … فاكر كمية البكاء اللي بكيتها لما أبويا سابني في المدرسة أول يوم لوحدي … ماكنتش عارف اعمل ايه …. وايه الناس اللي حوالي دول … رغم ان ابويا وصّى أحد المدرسين عليّ … لكن مش فاكر اصلا انو اهنمّ بي فعلا ….

فاكر كويس طابور الصباح الأول في تلك المدرسة …. لما كانوا بيحاولوا يسكتونا ويجمعونا في الطابور … وانا ملهي في اللي انا فيه وماليش دعوة بحد … تفاجأت باستاذ الطابور وهو بيطلعني لأني مشاغب وباضحك وباتكلم مع اللي حوالي …. 

أول صدمة لي في الحياة … أول احساس بالظلم … احساس قاتل مش ناسيه الى الآن … يارب مايخلينش سبب في ظلم إنسان أبدا مهما كان ..

المهم حاولت اقوله اني ماعملتش حاجة .. لكن طبعا مين هيسمع … طلعني برة الطابور … وضربني عصاية والا اتنين مش فاكر … وخلاني اكره المدرسة باللي فيها … وخلى يومي كله نكد في نكد 

مش فاكر طبعا بعد كده حصل ايه … لكن الأيام مشيت … وكل يوم بيعدي بنتعلم أكتر وبنكبر … 

فاكر استاذ القرآن “السعداوي” رحمة الله عليه … هو والعصاية بتاعته  … وازاي كان بيتفنن في ضرب اللي مابيحفظش … علشان كده رحتله وقلتله انا حافظ جزء عمّ كله .. وفعلا سمّعته عليه … وقعدت في أمان لغاية نهاية السنة … وخلاني العرّيف بتاع الفصل في حصته طول السنة  

بالرغم من تواجدي في مدرسة لتحفيظ القرآن … لكنها كانت من أسوأ المدارسة أخلاقا وأمانة وتربية للأطفال … كل ذكرياتي فيها سيئة … بالرغم من ال “250″ ريال اللي كنت باخدهم كراتب شهري من المدرسة … تشجيعا من الدولة لتحفيظ القرآن الكريم … هاسيب لخيالك ايه معنى الراتب الشهري ده على نوعية الطلبة الموجودة في المدرسة …

درست في هذه المدرسة أربع سنوات دراسية …. حتى أنهيت المرحلة الخامسة …. ظهرت خلالها في التلفاز مرتين في برنامج “في ظلال القرآن” …. وأكثر من مرة في الإذاعة في برنامج “ناشئ في رحاب القرأن” … كل مااتذكره من تلك التجارب .. المكافأة اللي كنت باحصل عليها كل مرة اطلع فيها في التلفزيون او اشارك فيها في الاذاعة …

كنت باخد المكافآت دي وارجع اوزعها على اللي في البيت … الوحيد اللي كان ليه دخل مادي في البيت غير أبويا طبعا …. وكانت حاجة كده فيها متعة :)

بالنسبة للسكن … فالاصدقاء كتروا … والحياة حلو وجميلة … استمتعت معاهم بكل لحظات الحياة … كورة وتنس وبلياردو وسباحة وبولينج …. بالاضافة الى حلقة حفظ القرآن بعد صلاة العصر … وطبعا النوم باكرا عند الساعة الثامنة كأقصى حد …

حياة بسيطة تكنولوجيا …. القنوات السعودية المحلية أقصى مافيها من ترفيه … وجودنا في السكن عوض ذلك النقص في أدوا تالترفيه بالنسبة لطفل مثلي ….

كنت باحفظ ورد من القرآن بشكل يومي واسمعّ على الوالد …. وأنهيت حفظ القرآن الكريم كاملا عند سن التاسعة … لكنه لم يكن حفظا متقنا …. ولم استطع النجاح في مسابقة حفظ القرآن الكريم اللي شاركت فيها بعد ماانهيت حفظ القرآن …. واكراما لأبي وللجهد اللي قضيته في حفظ القرآن … اعتبروني حافظا لخمسة أجزاء من القرآن الكريم …. افتكر ان صديق الوالد “الشيخ محمود سكّر” هو اللي كان بيختبرني في المسابقة دي … 

عدت الى مدرستي “الفرزدق الابتدائية” لدراسة السنة السادسة فيها … سبتمبر 1984م …

هاتكلم في المرة الجاية ان شاء الله عن الفترة من 1979 الى 1984 بالنسبة للأسرة وتطورات الحياة داخلها …

جمعة استرداد الثورة …

30 سبتمبر, 2011

ياترى مين متوقع ايه في اللي بيحصل ده …

انا شخصيا المشاعر متلخبطة … بس مايل اكتر لأن البلد فعلا ولا كأن قام فيها ثورة ولا حاجة … والدنيا زي ماهي … 

المفروض ثورة يعني قرارات ثورية يعني تغييرات جذرية ….

اللي حصل لا هو ثورة ولا هو وانقلاب … حاجة كده خاصة بالمصريين