كل سنة وانت طيب يافارس … يوم الأربعاء 14 يناير كان يومك … بارك الله في أيامك كلها .. هيصنا معاك ورهف كتبتلك رسالة جميلة جدا .. وغنينا ليك وطبعا انت مش فاهم حاجة.
شمعتين وجاتوه وامك واخواتك وابوك معاك وفرحانين بيك … وانت بتضحك وفرحان طبعا … يارب ديما
بارك الله لك فيما تبقى من عمرك … وحفظك من كل سوء
سأنقل هنا ماكتبته يوم ميلادك عن تلك اللحظة ….
اليوم : الأحد
التاريخ : 24 ذو الحجة 1427 هـ
الموافق: 14 يناير 2007م
الوقت : الساعة 22:25 … يعني عشرة وخمسة وعشرون دقيقة مساء
المكان: مستشفى الدكتور فخري – الخبر – السعودية
كان هذا الموجز .. والتفصيل لاحقا
============================
عودة مع التفاصيل
بدأت الحكاية الساعة سبعة وربع مساء … كنت في العمل .. متأخر كالعادة وشغال على تقرير مهم … الموبايل بيرن … البيت … قلت ربنا يسهل … اتصلت عالبيت .. ردت روان …
بابا هاتلي معاك دوا احمر ووردي … حاضر يابنتي … هاجيب … بس كده؟ ..ايوة مع السلامة ..
طبعا انا يعني لو اطول كان شديت شعرها من التليفون ..
هاقفل الا لقيت أم رهف أخدت السماعة … دخلت فيها شمال على طول .. ياشيخة حرام عليكي انا قلت خلاص هتولدي .. وفي الاخر تطلع روان بتلعب ..
قالتلي لأ طول بالك … انا اللي اتصلت .. وشكلي دخلت في مراحل الولادة ..جهز نفسك علشان تيجي بدري شوية <==قال يعني انا مش متأخر ساعتين بعد الدوام ماانتهي
المهم ..قلتلها بدري مين .. انا سايب كل حاجة وجاي ..جهزي نفسك ولبسي بناتك ونطلع المستشفى على طول ..
مستشفى ايه .. استنى .. لسة مافيش حاجة أكيدة .. قلت لأ ..نطلع خلاص …
ورحت البيت .. واخدتها ..والبنات ..وطلعنا للمستشفى … وطول مانا في السكة ..يابنتي في حاجة ..تقول لأ ..كله طبيعي .. طيب ياستي ..طبيعي طبيعي بس نطمن
وصلنا الطوارئ على الساعة تسعة … الدكتورة المناوبة كشفت … قررت انها لازم تنام في المستشفى … واتصلت بالدكتورة الاخصائية ..
وصلت الدكتورة هالة … بعد الكشف ..قالت تقدر تروح ..هتولد على الساعة 12 الظهر بكرة …
قلت طيب … ناخد البنات ننيمهم ..ونرجع لأمهم تاني …
وفعلا ..انهيت اجراءات الدخول ..ونزلت انا والبنات .. رحت دفعت ايجار البيت … وعديت على البشاوري اخدت نظارتي الجديدة … وطلعت للمزرعة علشان اجيب شوكولاتة للبنات اسكتهم بيها ..
اخذنا الشوكولاته .. وجينا نطلع .. رهف شافت البامبرز ..قالت بابا مش هتجيب بامبرز زي ماما ماكانت عايزة … قلت حاضر يابنتي ..
باحط ايدي على البامبرز .. الا والتليفون بيرن … مين؟؟ .. ام رهف … خير يارب ..ياترى المستشفى عايز مني ايه تاني
لقيت مش المستفى اللي عايز .. ده فارس باشا وصل بسلامة الله … وهي بتبلغني بالخبر ….
طبعا جري على المستشفى انا والبنات …. وطلعنا شفنا ام فارس .. وفارس
صوّرته كم صورة … والمستشفى كانوا مصورينه اول ماانولد ..اخذتها منهم …
وبعد مااطمنا عليهم ..رجعنا للبيت … وطبعا انا مش عارف هاعمل ايه بالبنات ..
وبس ..
توتة توتة ..خلصت الحدوتة
http://sa3sa3.jeeran.com/archive/2007/1/143324.html#comments