مصر لن تلعب في نفس المجموعة مع جنوب افريقيا لانهم من نفس القارة … وايطاليا على رأس المجموعة الثانية .. وبكده ماينفعش تكون اسبانيا في المجموعة بتاعة ايطاليا …
فاصبحت مصر وايطاليا في مجموعة وجنوب افريقيا واسبانيا في مجموعة .. وحسب قانون التصنيف كان لابد وأن تقع في نفس مجموعة ايطاليا ومصر
يعني .. من قبل القرعة … مصر وايطاليا والبرازيل في مجموعة …
طبعا كانت كلمة التمثيل المشرف هي الكلمة المناسبة في ذلك الوقت
قبل البطولة بأشهر … تعادلنا مع زامبيا في القاهرة .. قلنا معلش كبوة البداية … ومع استمرار الكبوة وهزيمة الجزائر … اصبحت كلمة التمثيل المشرف صعبة التحقيق … واحتلت مكانها جملة .. اقل خسارة ممكنة ..
قبل المباراة الاولى بساعات … كنت في العمل والدوام بيخلص الساعة 5 .. موعد بداية المباراة .. زملاء العمل بيناكفوا في … هتتهزموا بكام النهاردة ياعبدالرحمن … قلتلهم نتهزم مين انت وهو .. ده افضل حاجة ممكن تعملها البرازيل النهاردة انها تتعادل معانا … طبعا متخيلين ردة فعلهم كانت ايه …
طلعت بدري لكن السكة كانت زحمة … وصلت لقيت النتيجة 2-1 للبرازيل … يامسهل احنا بنجيب اهداف اهه …. تفرجت على المباراة .. البرازيل كانت ماسكة بس احنا بنلعب برضه ومش خايفيين … اطمنت ..مافيش 8 ان شاء الله … كنا قريبين من التعادل في الشوط الاول … لكن البرازيل احرزت الهدف الثالث …
رجع القلق تاني … يعني ممكن تنتهي على خمسة او ستة … يارب كفاية على ال 3 وتنتهي كده
وفي دقيقتين .. اصبحت النتيجة 3-3 … ومسكت مصر الكورة اكتر من البرازيل بعد كده ..وهجمات ضاعت بالهبل … ماشاء الله هنفوز ياجدعان والا ايه … يارب الرابع يارب ….
ومع اقتراب النهاية كنت زعلان ان احنا مش هنفوز ..وان شكل البرازيل فعلا هيكون افضل حاجة تعملها انها تتعادل معانا … لغاية ماحصل اللي حصل ودخل البلنتي …
الخوف من ايطاليا اصبح مسيطرا في داخلي … ايطاليا غير .. بتلعب بكل لعيبتها مش زي البرازيل .. ولسة هازمة امريكا ب 3 … ومش جاية تهزر هنا … يعني هي دي مباراة ال 8 اللي لازم نخاف منها … واحنا طبعا مجهدين جدا من مباراة البرازيل … يبقى ياريت بس نقلل عدد الاهداف فينا … ونرجع نفكر في مباراة راواندا … وازاي ممكن نتأهل لكأس العالم
ولكن كان لدينا سدا عاليا في حراسة المرمى .. منع كل الكرات السبعة المحققة من تجاوز خط المرمى … طبعا كل هذا بعد توفيق الله عز وجل …
الان .. اصبح من حقنا ان نحلم …
ليه ما نفوزش على الفريق الاضعف “أمريكا” ب فرق 3 أهداف ونضمن المركز الاول في المجموعة ونبتعد عن مقابلة أسباينا في نصف النهائي ؟؟؟ ونفوز ونوصل النهائي … والرجالة ياخدوا الكاس
حتى لو ماطلعناش الاول على المجموعة .. ليه مش تفوز جنوب افريقيا النهاردة على اسباينا .. وتبقى اول مجموعتها .. وتقابلنا في نصف النهائي ؟؟؟
وفي نفس الوقت .. اتذكر جيدا كأس القارات عام 1999 … عندما تجاوزنا الاصعب .. بوليفيا والمكسيك بالتعادل .. وكان يكفينا التعادل فقط مع السعودية كي نتأهل لنصف النهائي …
ولكن بكل أسف اكلناها خمسة من الفريق الاضعف اللي لسة كانت المكسيك فايزة عليه بخمسة ..
ربنا يستر .. ويكمل المشوار على خير