أخويا خلع … وسابني لوحدي

نكمل الحكاية

وقفنا عند مايو 2008م .. وبداية الغوص تجاه المجهول ….
وازاي كان الدافع الكبير لي هم اخواني اللي قدموا قبلي …. 

بعد شهرين … كان الرد الصاعق من ادارة الهجرة لأخي الأصغر بالاعتذار عن فحص طلبه كون نظام الهجرة طور التغيير والتطوير …
وأعادوا له الشيك الذي أرسله لهم …

طيب وانا … فين الشيك بتاعي … خلاص بئى …مادام اعتذرلوله هيعتذرلولي أنا كمان … وطبعا أحسن بما انه مش رايح انا مش عايز …

ومر شهر كمان … ولا حس ولا خبر … طب اعمل ايه … ادخل على الموقع بتاعهم وادور على طريقة ابحث بيها عن حالة ملفي … طبعا مش قادر لأن مافيش أي معلومات عندي …
بعتلهم ايميل من الموقع … وماحدش رد …
طنشت وقلت ياخبر النهاردة بفلوس … 

بعد سبعة أشهر … لقيت جواب في صندوق بريدي في الشركة … في الأول كنت باعتلهم عنواني على صندوق بريدي اللي موجود في الشركة … هو صندوق واحد للشركة كلها … وبعدين بيوزعوا الرسائل على صناديق داخلية لكل فرد ….
لقيت الرسالة موجودة ومفتوحة كمان  وكانها يعني راحت لغيري بالغلط فلما فتحها وانتبه انها مش ليه رجعها ووصلت سالمة لي … مش مهم انها ضاعت ..المهم انها وصلت سالمة الى صندوقي

وطبعا كانت مفاجأة لي اني الاقيهم بيكلموني باسمي وبرقم الملف بتاعي … وبيقولوا انهم الان أصبحوا جاهزين لاستلام أوراقي …
وطبعا ارشادات واضحة لكل ماهو مطلوب …
كنت فاكر ان دي اول رسالة منهم .. لكن اللي فهمته بعدين انو أكيد كان فيه رسالة سابقة فيها ترحيب وتعريف برقم الملف بتاعي لكن ماوصلتش …

اعطوني مهلة لو فاكر صح كانت 90 يوم … علشان ابعت المستندات … وانا طبعا أصلا متضايق ان الحكاية كملت وكنت فاكر هيكون ردهم لي زي ردهم على أخويا …
فماتحمستش كتير للاسراع في تجميع الورق المطلوب … ومارضيتش ادخل امتحان اللغة وكتبتلهم بداله صفحة كده اشرح فيها انا ليه معتقد اني شكسبير ومش لازم اهين نفسي في امتحان لغة .. 
في النهاية جمعت كل حاجة … ووديتهم لمكتب ترجمة في الدمام هنا …. وفعلا خلال 90 يوم كنت باعت كل حاجة ليهم ..كان ده في مارس 2009 …

بعد كم يوم وصلتني رسالة منهم بيطلبوا فيها 150 دولار علشان ابني .. انا مش ناقص يعني بلاهة … مانا بعت المبلغ كامل …
تأكدت من الأرقام ورحت باعت ليهم ايميل قلتلهم ياجماعة انا فلوسي كاملة تأكدوا الله يخليكم …
وطنشت … وماردتش بالبريد العادي … وماوصلنيش رد منهم 

بعد 3 أشهر .. قلت اشوف كده الدنيا ماشية ازاي … وبعتلهم ايميل … قلتلهم ياجماعة انتم لسة مستنيين فلوس مني والا ايه 

قالولي ياعم انت نايم على ودانك .. محنا بعتنالك من شهرين “في ابريل 2009م” وقلنالك عايزين امتحان اللغة وفيه كام سؤال كده محتاجين توضيح …
بصراحة ..عرقي الشكسبيري نقح …. وقلت هاطنش وهم أكيد هييأسوا مني ويكملوا الحكاية من غير الامتحان ده …
بس طبعا رجعت الى صوابي … وقدمت على الامتحان اللي طبعا لازم تحجزله قبلها بكام اسبوع …. وفيه امتحان اكاديمي وامتحان عام .. وحكاية ياعم الحج

انا تضايقت طبعا من حكاية البريد اللي مابيوصلش ده .. ورحت استأجرت صندوق بريد خاص لي لوحدي بعيد عن بريد الشركة ..

المهم حجزت وامتحنت …. وانا مطنشهم ومش باقولهم انا باعمل ايه … والمهلة اللي قالولي عليها في الايميل انتهت وخللت كمان … 

وسافرت مصر اجازة وجيت وانا اخر طناش … 

لغاية ماوصلني ايميل في نوفمبر 2009م بيقولولي فيه … 30 يوم .. ماوصلش المطلوب …. برة

Facebook Comments
هذه المقالة كُتبت في التصنيف 0- خواطر و يوميات, إجراءات الهجرة ومراحلها. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *