الميديكال … مرة واحدة لاتكفي

نكمل الحكاية

مازلت في انتظار الخطوة القادمة في طريقي نحو المجهول …
ورقي اكتمل كما كنت أظن … وفي انتظار قرارهم …

من قراءاتي … كنت عارف ان الخطوة الجاية واحد من اثنين .. يايقولولي شكرا ..كفاية كده … مش عايزين النهاردة
يايبعتولي الميديكال …

نسيت أقول ان خلال الفترة دي كانت أوراق أخي الأكبر انتهت بالفعل … وأخد الفيزا … ونزل بالفعل هو وأسرته وعملوا اللاندينج ورجعوا تاني …. 
أولاده الان في كندا بيدرسوا في الجامعة …. وهو مازال في الخليج …. هم هناك في السكن الداخلي للجامعة ..

طبعا شيء مشجع … على الأقل عندك حد هناك تعرفه ….

عموما … مرت الأيام … والاولاد امتحنوا … وقررنا ننزل مصر في الاجازة برغم كل الكلام اللي كان بيتقال عن الأمن وعن غيره … وفعلا نزلنا في شهر أغسطس 2011 …
يادوب نزلنا مصر … والاقي ايميل منهم بيقولولي انت فين … بعتنالك الميديكال من شهر يونيو 2011 وانت ماردتش علينا لسة … يادي النيلة … طب اعمل ايه دلوقتي انا …

افتكرت الحكاية بسيطة .. بعتلهم قلتلهم انا ماوصلنيش الورق في يونيو 2011 … وانا الان في مصر وممكن اعمل الطبي من هنا … ينفع والا ايه …
قالوا لأ ماينفعش لأن الطبي لازم يتعمل باستخدام الورق اللي احنا بعتناه ليك لأن الورق بالصور ….
قلتلهم طب اعمل ايه .. الورق ماوصلش لي …وانتم طالبين اني ابعت النتيجة خلال 30 يوم …

المهم … صعبت عليهم … وقالوا ماشي … ابعتلنا صور تاني … واحنا هنبعتلك طلب طبي تاني والمرة دي هيكون خطاب مسجل علشان نضمن انه يوصلك …. قلتلهم ماشي .. والله ماقصرتم :)…

دخلت وقتها في منتدى آخر وطلبت المشورة … لأني ماكنتش عارف الميديكال ده بيتعمل ازاي … والاخوة هناك هم اللي دلوني على الحوار اعلاه … والحمد لله تمت الامور زي مانصحوني … 

خفت ابعت الصور على طول وانا في مصر وبعدين الميديكال يوصل السعودية وانا في مصر ويحصل فيه اي حاجة لا سمح الله .. فكملت اجازتي عادي وقررت اني ابعت الصور لما ارجع السعودية تاني …

استمتعت باجازتي … ورحت الاسكندرية كمان كام يوم 🙂 .. أول مرة أنزل الاسكندرية مع أسرتي … 

ماعلينا … 

رجعت تاني … وبعتنا الصور في شهر سبتمبر 2011م … وفعلا خلال كم يوم وصل جواب الميديكال بالحفظ والصون ….

انا ماكنتش مستني الجواب … رحت فعلا كلمت الدكتور ميلاد ..في مستوصف ايه والله مانا فاكر اسمه …. المهم كلمته وقلتله الورق في الطريق وانا عايز اكسب وقت .. ممكن اعمل الفحص الطبي الان والا لأ … الراجل قالي تعالى نفتح ملفك ونشوفك ..

انا كنت فاكر انه ممكن يعمل الفحص الان بحيث ان النتائج لما تطلع يكون ورق الميديكال وصل ونبعت على طول ..
لقيت ان الحكاية مش كده .. وأصلا مش من مصلحتي اني اعمل الكشف الطبي قبل مايجي الورق .. لأن اللاندينج لازم يتعمل خلال سنة من الكشف الطبي … وماحدش يضمن الورق هيجي امتى .. فانا الخسران

وفعلا استنيت لما ورقي وصل في أواخر اكتوبر 2011 … وكلمت الدكتور ميلاد تاني ورحنا وعملنا الأشعة … 
كنت خايف من الميديكال لأني عامل عملية الديسك عام 2009م … وطبعا قلتله عليها لكن الراجل قالي مافيهاش مشاكل … 

خلص الكشف … وبعت الورق هو مباشرة .. ماينفعش انا اخد الورق وابعته .. هو بيبعته مباشرة حسب النظام المتبع … وطبعا على حسابي 🙂

ورحت دفعت فلوس ال RPRF .. اللي هي فلوس اللاندنج .. وبعتها هي كمان ليهم

في جميع مراسلاتي ليهم كنت بابعت باستخدام ال DHL .. حصل مرة اني رحت ابعت ورق فماعاملنيش بشكل كويس الباشا اللي هناك .. فسبتهم وقلت اشوف شركة تانية ابعت منها .. بلاها DHL … يومها رحت اشيك على صندوق بريدي وسألتهم عن الورق اللي عايز ابعته … عندكم خدمة حلوة ومضونة ياجدعان .. قالولي الرسائل الدولية بنبعتها عن طريق الشركا ت الدولية أصلا .. وبثلث السعر اللي كنت بادفعه لل DHL … وعرفت انهم بيستخدموا ال Royal Mail … 
فقلت ماشي … ومن يومها وانا باستخدم البريد السعودي الممتاز في مراسلاتي مع مكتب لندن .. ومافيش مشاكل والحمد لله

بعتلهم الشيك المصدق … وكلمت الدكتور ميلاد وتأكدت انه بعتلهم ورقي …. وحطيت رجل على رجل …وانتظرت الخطوة اللي بعد كده .. ده كان في شهر نوفمبر اللي فات .. نوفمبر 2011م

Facebook Comments
هذه المقالة كُتبت في التصنيف 0- خواطر و يوميات, إجراءات الهجرة ومراحلها. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *