جمارك وجوازات .. ونوووووم


رحلتنا من أبو ظبي إلى كندا تأخرت ساعة … وبكده نزلنا تورونتو الساعة 5 و ثلث مساء يوم السبت 27 أكتوبر … 2012
كنا قاعدين في آخر الطيارة … وكعادتي ماباحبش حكاية الوقوف اول ماالطيارة تنزل المدرج … فاستنيت لغاية ماالناس نزلت كلها ونزلنا براحتنا …

وصلنا للجوازات … كان راجل بيستظرف دمه … غتيت جدا … اديتله الكرت بتاع الدخول وكروت ال بي ار … وباطلع في الجوازات .. الا الباشا بيستظرف ويقولي انت فاكرني هاستفيد حاجة من البي ار بتاعكم .. وهو بيتكلم كنت باحط الجوازات قدامه .. فسكت وماكملش جملته ..
سألني بقالكم كام بره .. قلتله شهرين .. فقالي يعني ماقعدتش في كندا حاجة .. قلتله قعدت شهر .. فاستظرف تاني وقالي لا لا .. صدقني لسة ماشفتش حاجة … <= ابتسامة صفرا مني
بعد شوية سألني معاك أكل … قلتله لأ ماعدا الشيكولاته اللي اخدوها الأولاد في الطيارة … فقالي يعني معاك الشيكولاته .. قلتله آه .. قالي امال بتقول لأ ليه لما سألتك معاك أكل … <== ابتسامة صفرا تانية
سألني عن العفش اللي معايا … قلتله معايا 10 شنط
آخر سؤال كان عن الفلوس .. قلتله مش معايا حاجة .. فلوسي في كندا …
ختم الجوازات وكتب على كرت الدخول بالأحمر رموز كده .. واخدت كل حاجة ومشيت

رحنا للشنط … اخدنا عربيات التحميل <== كنت عامل حسابي ومخلي معايا كوينز 2 دولار
حملنا الشنط .. وتوكلنا على الله إلى الخروج …. اللي كان واقف هناك شاف كرت الدخول فقالي تفضل من هنا … منطقة الجمارك يعني
صف طويل عريض .. قعدت الصغار وانتظرنا في الدور … كل اللي قدامي بيتفتشوا والظاهر بيلاقوا معاهم أكل وبيرموه …
واحد منهم قلعوه الجاكتة وفتشوا جيوبها !!!
وصل علينا الدور بعد ساعة وشوية … كنت مجهز الورقة اللي انا قدمتها ليهم وختموها وقت اللاندينج .. وكنت معلم على الجداول اللي موجودة فيه عن الحاجات اللي معايا منهم
الراجل انبسط ومسك مسطرة فارس وقعد يحط خط على كل صف انا قلت اني جبته …
وفي الاخر ختم واداني الورق وقالي مع السلامة ..

بالبساطة دي … ده انت لو بصيتلي بس هاعترف على طول 🙂

خرجنا سالمين بحمد الله .. واتصلت بالفندق .. قالولي استنى عند S5 … فين دي ياجماعة .. قالوا اسال بس وانت هتوصل …
وصلت هناك وكلمتهم وخمس دقايق كان الباص عندي … وصلنا الفندق … أخدنا الغرفة …. وعينكم ماتشوف الا النوووووووووووووم

وكانت دي نهاية رحلة السفر الطويلة دي 🙂

هذه المقالة كُتبت في التصنيف السفر. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.