نقل العفش من تورونتو إلى ساسكاتون


حلو لما الواحد ينحط قدام الأمر الواقع والظروف تخليك تخلص سريع سريع

من يومين بدأت أراسل شركات نقل العفش علشان اعرف الموضوع ماشي هنا ازاي
في المعدل الباوند ب ٥٥ سنت … يعني الكيلو بحوالي دولار و ٢٠ سنت
المهم الكل قالي انهم عايزين فترة ٥ أيام أبلغهم فيها قبل يوم الشحن … علشان يحجزولي مكان

قلت ماشي … وكلمت المدام وقلتلها لما تقربي تجهزي قوليلي … علشان اكلمهم واكسب وقت … أول امبارح قالتلي انا قربت خلاص .. يومين كمان واخلص

قلت تمام نكلم بقى الشركة اللي وقع عليها العين … قلتلهم عايز أحجز قي أقرب فرصة … لقيته بيقولي حظك حلو … عندي عريية طالعة بكرة “يعني امبارح” وفيها مكان فاضي … ياراجل ! طيب خليها بعد بكرة … قال لأ يابكرة يا الأسبوع الجاي ..
قلت لأ طبعا بكرة …. وربنا يعينك يامراتي …

طبعا كلمتها وأكيد لطمت الغلبانة … وكلها كام ساعة والسواق فعلا وصل مع 3 معاه … فكوا اللي محتاج يتفك … ولفوا العفش ..وشالوا على التريلا … 3 ساعات تقريبا كان مخلصين فك ولف وتحميل
أسبوع ويكونوا هنا ان شاء الله

وبناء عليه حجزت ليهم خلاص …. يوم الاثنين الجاي يكونوا هنا ان شاء الله
اللي هو برضه نفس اليوم اللي هاستلم فيه البيت …

فيه شوية حاجات لازم تتعمل مع النقل
1- تكلم شركة الكهرباء في تورونتو علشان تشيل اسمك من الشقة اللي هناك
2- تكلم شركة الكهرباء والغاز هنا في ساسكاتون علشان يحدوا اسمك من أول يوم 15 ..
3- اللي فهمته اني ممكن اكلم البريد الكندي واطلب منهم يحولوا اي رسالة تيجيلي على عنوان تورونتو الى عنواني في ساسكاتون
لسة مش عارف ازاي
4- فيه شوية عفش سبناهم في تورونتو لسة مش عارف هاعمل فيه ايه … حاجات بسيطة بس أكي ماينفعش نسيبها في الشقة

بس كده 🙂

هذه المقالة كُتبت في التصنيف السفر, السكن في كندا, ساسكاتون, مواقف وطرائف. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.