واتلم الشمل من جديد


الأسبوع اللي فات كان اسبوع الفاميليا … الحمد لله الأمور ماشية تمام بفضل من الله ونعمة …

العيلة وصلت يوم الاثنين مساء بعد ماشحنا العفش من تورونتو .. والباقي تم التصرف فيه .. وسلمنا الشقة زي ماسلمناها …
ركبوا الطيارة .. WestJet … ووصلوا في موعدهم سالمين بحمد الله وكنت انا في الانتظار طبعا … المطار صغير وسريع سريع بيخلصوا …
انا كنت استلمت البيت الجديد قبل وصول رحلتهم بساعتين … نزلت الحاجات اللي كانت قاعدة في العربية من وقت ماجيت ساسكتون وطلعلتلهم عالمطار …

طبعا مافيش عفش لسة .. مقضيينها مراتب لغاية مايوصل العفش النهاردة ان شاء الله ..

الأولاد اخدتهم المدرسة اللي جنب البيت تاني يوم … وتسجلوا وراحوا لفصولهم …
فارس مواليد يناير 2007 … قانون ساسكاتون بيسمح لمواليد شهر يناير دخول أولى ابتدائي … غير قانون تورونتو .. اللي بيسمح لمواليد ديسمبر بس ….
المهم قلتهم دخلوه أولى … وسجلوه فعلا في أولى ..
بعد يومين الأبلة المديرة بتكلم أم فارس وتقوللها شكله ابنك فاته كتير وأولى صعبة عليه … مش هيقدر يكمل … والسنة الجاية هتبقى أصعب وأصعب …
ياخسارتك يا سنة .. بعد مافرحنا بيها لكن شكلها جت متأخرة ..
عموما وافقت انه يرجع للي كان فيه … كي جي … والسنة الجاية يبدا أولى على رواق …
خصوصا وأنه مابقاش حابب يروح المدرسة .. وعايز يرجع للمس بتاعته هناك …

النت دخل في يومين …. واشتركت في كيبل تلفزيون … لقيت عرض عليه لمدة 6 أشهر … والناس اللي قبلي في البيت سابوا التلفزيون بتاعهم … فقلت خليني اشترك ال 6 شهور دول في الكيبل واشوف اخباره ايه …

باقيلي ايه ماعملتوش …
1- التأمين الصحي
2- عايز ابلغ الضرائب بنقل عنواني وكمان بتوع التشايلد بنيفت
انا قدمت للاثنين قبل مااجي هنا بكام يوم … ولس ماوصلنيش حاجة منهم

طبعا انا اشتركت في خدمة تحويل رسائلي البريدية الى عنواني الجديد .. بتكلف تقريبا 50 دولار لمدرة ستة أشهر ..
أي رسالة تروح لعنواني القديم خلال الفترة دي يحولوه لعنواني الجديد

باقي كمان اخلص من شقة تورونتو …
بعد ماقدم عليها ناس وعايزينها .. ادارة العمارة رفضت وقالت الكريدت هيستوري بتاعه مش تمام ..
يعني ايه .. مش فاهم .. اقعد ادفع انا علشان حضراتهم مش عاجبهم الكريدت هيستوري …
لا وكمان لقيتهم مغليين سعر الشقة 40 دولار … ومافيش حد ياخدها اقل من سنة
هاتصل بيهم الاثنين علشان اشوف حكايتهم ايه …
ماهم مش خسرانين حاجة ..
عموما انا مادفعتش حاجة ليهم لسة من يوم مامشيت … عندهم شهر انا دافعه بدري كان يغطي شهر أربعة … وبعدها يحلها ربنا

بس خلاص 🙂

هذه المقالة كُتبت في التصنيف الإتصالات في كندا, التاريخ الإئتماني, التشايلد بنيفيت Child Benefit, التعليم في كندا, السفر, السكن في كندا, الصحة في كندا, الضرائب الكندية, مواقف وطرائف. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.