رحلة لاندينج سعيدة وموفقة

لكل اللي بدأ التخطيط لرحلة اللاندينج … وناوي يرجع تاني …. حيرته بتكون حيرة … ينزل كام يوم … وينزل فين … ومواصلاته ايه … واجراءات ايه اللي لازم يخلصها ….. وهيصرف كام في الرحلة دي …. 
كلها أسئلة مشروعة …. تشغل بال كل من يخطط لرحلة اللاندينج … علشان كده هاحاول الخص أهم الحاجات اللي المفروض تتعمل خلال رحلة اللاندينج هنا …

1- إجراءات حكومية …. 
أ- مجرد وصولك للمطار … فانت بتبدأ أول اجراءات الهجرة إلى كندا … وبتنتهي في المطار من اجراءات استخراج كرت الإقامة … ال PR … وبكده تكون عملت أهم حاجة مطلوبة منك …. 
يعني لو لفيت ورجعت تاني … وركبت أول طيارة تاني لبلدك .. محدش له حاجة عندك خلاص … 🙂
طبعا محتاج تكون مجهز عنوان سكن ليك تقدمه ليهم خلال الاجراءات في المطار … لكن ماتقلقش لو مش معاك .. الدنيا مش هتوقف .. والاجراءات بتتم عادي وبيطلبوا منك تبلغهم بالعنوان وقت مايكون عندك واحد …
ال UPS كان حل مناسب لي جدا في يوليو 2012 … معرفش اذا كان مازال حل مناسب للناس والا لأ … 

ب- السين نمبر … SIN Card … تاني حاجة ممكن تعملها في كندا … ومش مطلوب ليها أي ورق تاني غير الورق اللي هتاخده من المطار … وثيقة اللاندينج … وعنوان السكن… وحاجة بتخلص بسرعة ومش بتعطلك … 
ورقم الضمان الاجتماعي ده مطلوب فقط للعمل … يعني حتى لو ماتعملش مافيهوش ضرر كبير … لكن مش هتقدر تتفق على شغل من غيره …. 
هم بيدولك ورقة فيها رقمك على طول … والكرت بيبعتوه خلال اسبوعين للعنوان اللي اديته ليهم …. فلو مش معاك عنوان لسة فمش مهم تطلعه دلوقتي …

ج- فتح حساب بنكي … وفتح حساب كريدت  …. وانصح ببنك TDCanada  … عندهم عروض للناس الجدد كويسة … وبيفتحوا الحساب والكريدت مجانا … حتى لو ماعندكش هيستوري …. جوازك ووثيقة اللاندينج كفاية ليهم … بيطلبوا رقم تليفون وعنوان سكن كمان علشان هيبعتوا كروت الكريدت والرقم السري على العنوان 

أعتقد ان ال 3 حاجات دول مهمين … وبيطلعوا بسرعة ….. وواضح ان العنوان حاجة مهمة في جميع الإجراءات .. لأن المراسلات بتتم من خلال العنوان … ومن غير عنوان سكني في كندا .. انت غير موجود 🙁

2- السكن 
بالنسبة للسكن … فالخيارات متعددة … ومواقع حجز السكن متوفرة … والأسعار متفاوتة … وكل واحد بيحب يسكن ازاي …
Booking من أحسن المواقع اللي تعاملت ومازلت باتعامل معاهم عند البحث عن سكن ..
Kijiji كمان ممكن يكون مفيد …
وفيه مواقع كتير متوفرة …. 
خد بالك بس لو نويت تحجز مباشرة مع أشخاص عاديين … مش ديما الكلام اللي بيكون مكتوب في النت وصفا لمنازلهم بيكون كلام دقيق وجميل زي ماهو مكتوب …. 

3- المواصلات
شبكة المواصلات في كندا كبيرة … والناس بتعتمد عليها في حياتهم اليومية …. كل مدينة وليها شبكتها الخاصة بيها .. وهناك شبكات تربط بين المدن كذلك …. 
ممكن جدا تعتمد على المواصلات … وممكن تأجر عربية ….
لو هتأجر عربية .. ابدأ في التواصل معهم قبل النزول الى كندا .. واسأل عن كل ماتحتاجه … جي بي اس … كراسي أطفال … الخ الخ

4- الأكل 
موجود في كل مكان … ماتقلقش … فيه مدن منتشر فيها مايمسى بالأكل الحلال … وفيه مدن هتتعب شوية لغاية ماتلاقي مكانهم فين 

أعتقد ان هي دي أهم الحاجات  … واذا نسيت حاجة فكروني …. 

ايجار السكن … يبدأ من 100 دولار في اليوم … ويصل إلى مايشاء الله …. ممكن تلاقي أقل من 100 .. لكن مش كتير …
ايجار سيارة … يبدأ من 30 دولار يوميا .. حسب النوع والحجم .. من غير التأمين … التأمين بنفسه حوالي 30 دولار تانيين في اليوم … وكل حاجة هتطلبها منهم ليها ثمن … زي ال جي بي اس او كراسي الأطفال … 
عنوان ال UPS  كلفني 200 دولار  … ايجار سنة

رحلة لاندينج سعيدة إن شاء الله

Facebook Comments
It's only fair to share...Share on FacebookShare on Google+Tweet about this on TwitterShare on LinkedIn
هذه المقالة كُتبت في التصنيف إجراءات اللاندينج وما بعدها, الأكل والمطاعم, السكن في كندا, المستندات الكندية, المواصلات في كندا. أضف الرابط الدائم إلى المفضلة.

8 تعليقات على: رحلة لاندينج سعيدة وموفقة

  1. المصري أحمد كتب:

    لو ممكن اضيف حاجه بعد اذن الباشمهندس الكبير، من الحاجات اللي بيقولوا انها مهمه انك تعمل لسته بالممتلكات اللي ممكن تدخلها كندا بعد كدا, زي العربيه، الذهب، اي منقولات او اجهزة. لان بعد كدا كله بيتجمرك او بتدفع عليه ضرايب.
    صحح لي المعلومه يا باشمهندس لو فيه حاجه غلط

    • عبدالرحمن الطويل كتب:


      طبعا معاك حق …
      بس الموضوع كان هدفه الحاجات اللي تتعمل جوة كندا … بعد ماتطلع من المطار …

      لكن من المهم طبعا تكون ورقة العفش معاك جاهزة .. نسختين كمان … وبالتفصيل الممل لو تقدر 🙂

      منور

  2. محمد كتب:

    السلام عليكم. .لو سمحت اخى الفاضل ايه حل ups الواحد برده قلقان من رفض ال بى ار عشان الصور والواحد مش فى كندا لو فى حلول عندك يبقى الف شكر ليك

    • عبدالرحمن الطويل كتب:


      وعليكم السلام ورحمة الله …
      أهلا بيك يامحمد … ال UPS دي حاجة انا عملتها من حوالي 3 سنوات … بصراحة معرفش اذا كانت لسة الخدمة موجودة أصلا أو لأ …
      سمعت بعد كده شكاوي من ناس استخدموا الخدمة دي … فأحسن حاجة انك تتصل بنفسك بمكتب ال UPS اللي انت عايز تتعامل معاه وتسأله بنفسك …
      انا عملت كده من 3 سنوات ومافتحتش الخدمة معاهم الا لما أكدولي انهم هيبعتولي الكروت اول ماتوصل ..

      بالتوفيق

  3. محمد كتب:

    السلام عليكم. ..ازاى حضرتك ياباشمهندس يارب تكون فى احسن حال سؤال بالنسبة لكروت البى ار بتيجى كلها على العنوان وباسم واحد عشان موضوع. Ups بيقى باسم واحد ف بالنسبة للاولاد والزوجة كروتهم بتيجى باسمى برده..
    فى سؤال تانى بعد اذنك بالنسبه لعنوان ups فى حاجه اسمها suite # او# pmb يعنى اكتب اى واحد فى العنوان عشان فى مكتب الهجرة فى المطار يقبلوه ولا ممكن اكتب العنوان من غير suite او pmb ..اسف على الاطاله وجزاك الله كل خير

    • عبدالرحمن الطويل كتب:


      وعليكم السلام ورحمة الله …
      الحمد لله انا تمام التمام … شكرا للسؤال … ويارب تكون أمورك واستعداداتك في أحسن حال

      شوف ياسيدي .. مبدأيا .. في كندا .. الزوجة كيان منفصل تماما عن الزوج … مافيش حاجة اسمها ان الزوج ممكن يعمل أي حاجة لزوجته لمجرد انه زوجها … لو معاه توكيل ماشي .. مافيش .. يبقى زيه زي أي حد تاني ..

      بناء عليه … الكروت بتيجي كل واحد باسمه … والمفروض مايكونش عندك مشكلة في الصندوق لأنك ممكن تكتب أسماءهم معاك في الصندوق .. أفتكر كان ليا عدد معين أضيفهم على الصندوق معايا .. مش فاكر كان خمسة والا أكتر والا أقل …

      بالنسبة للعنوان .. ماافتكرش حكاية ال pmb دي … انا افتكر ال suite بس …وكنت باكتبه في العنوان … علشان هو ده رقم الصندوق بتاعك ومن غيره مش هيعرفه لأي صندوق رايحة الرسالة …

      في المطار أنا قلتلهم ان ده عنوان ups لما سألوني .. قلتلهم ماعنديش معارف لسة .. وده العنوان اللي عندي

      هل اختلفت الأمور مابين 2012 والآن …. ممكن جدا …. معلوماتي قديمة … والدنيا هنا بتتغير كل شوية

      ربنا يوفقك

  4. محمد كتب:

    السلام عليكم باشمهندس يارب تكون فى افضل حال وربنا يجعل المعلومات الى بتفيد بيها الناس فى ميزان حسناتك…سؤال من فضلك بالنسبه للمبلغ الكاش الى ممكن تشيله معاك وتعدى فى مطار القاهره بدون مشاكل مكتوب 10 الاف دولار لكل راكب هل لو اسره مكونه من 4 اشخاص (زوج وزوجه وطفلين) يبقى المبلغ 40 الف دولار ولا 20 الف دولار ولا 10 الاف دولار للجميع…ارجو الافاده ان امكن…

    تحياتى اخى الفاضل

    • عبدالرحمن الطويل كتب:


      انت ممكن تشيل اي مبلغ معاك … مهما كان عدده …

      اللي انت بتتكلم عليه هو امتى لازم تفصح عن المبلغ ده ..

      لو كان معاك اكتر من ١٠ الاف دولار لكل شخص اكبر من ١٨ سنة .. لازم تفصح عن المبلغ ده .. والإفصاح عنه بيكون في كارت الدخول اللي بيتوزع عليك في الطيارة .. بتعلم علامة على المربع بتاع ان عندك مبالغ مالية اكتر من ١٠ الاف دولار .. وبس

      في جميع الأحوال … في رحلة اللاندينج .. غالبا بيسألك موظف الهجرة عن المبلغ اللي معاك ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *