الميكانيكي والحلاق .. ودكتور الأسنان

ماحصلتش معاك لما خربت عربيتك .. ووديتها لميكانيكي … فطلّعلك كل الميكانيكية اللي اشتغلوا على العربية بتاعتك قبل كده مابيفهموش حاجة وهم سبب خراب العربية
طيب ماحصلتش معاك عند الحلاق … وهو بيمصمص شفايفه وبكل قرف يقولك .. هو مين حلقلك الحلقة دي … مش تنقي كده حلاقين بيفهموا بدل اللي بهدلك راسك ده …
طيب ايه رأيك اني رحت لحلاق مرة … وقالي نفس الجملة أعلاه … فرديت عليه وكنت صادق وقتها … تصدق ان الحلاق ده يطلع حضرتك ياجميل ….. 

طيب … ايه رأيك في الدكاترة …. زي ميكانيكية العربيات والا أسوأ 🙂 … معلش ماحدش يزعل مني … كلكم حبايبي …. بس تروح للدكتور من دول …. تلاقيه يقولك مين ال xxxx اللي وصفلك الدوا ده …. مش تخاف على صحتك ياخي وتختار تروح لمين …

من يومين قررت زيارة طبيب الأسنان … قلت أشوف الحكاية ايه … والشغل هنا عامل ازاي …. والأسعار فعلا نار والا ايه …
لقيتها نار ياحبيبي نار فعلا …. تنظيف الأسنان … كل ربع ساعة ب 40 دولار تقريبا … بربع الكيلو شغالين هنا … … وخلع السن 120 دولار …. والعصب الواحد بيكلف 250 دولار … طبعا لما تعرف ان فيه ضروس فيها 4 أعصاب … يبقى هتعرف انك هتدفع 1000 دولار علشان تريح نفسك من آلام السن الجميل ده … أو تعتمد على القرنفل وأمرك إلى الله لغاية ماتنزل أجازة في أقرب وقت

قلت ماشي … بقالي سنة ونص مانظفتش أسناني .. فخلونا ننظفها …. ربع ساعة ربع ساعة …. قالتلي أخصائية تنظيف الأسنان وهي مبتسمة … ربع ساعة مين ياكابتن … الجلسة دي هنعمل الجزء التحتاني .. والجلسة التانية هنعمل الجزء الفوقاني بمشيئة الله … وكل جلسة عبارة عن ساعة كاملة … 
ساعة كاملة … يعني 300 دولار مرة وحدة … خراب بيوت مستعجل … طبعا بما إن التأمين بيدفع جزء محترم منه … فقلت وماله … ننظفهم .. مايضرش … 

بعد ماكشفت على الأسنان .. سألتني … انت عمرك عملت تنظيف للأسنان دي …. قلتلها طبعا .. كل ستة شهور كنت باروح اعمل تنظيف ليهم وانا في السعودية … هو بس من يوم ماجيت كندا دي أول مرة … يمكن علشان كده فيه شوية حاجات متجمعة …
قالتلي وماله ياخويا … يجوز برضه ….

وتوكلت على الله واشتغلت … وهاتك ياحفر وهاتك يافحت … خير ياستي .. انتي بتعملي ايه …. اسكت ياخويا .. ده انت شكلك عمره ماحد نظفلك أسنانك أبدا … طبقات طبقات … زي الأسمنت …. ليه ياست الكل بس … صدقيني كنت باروح كل ستة شهور … 
رجعت تاني تقول … وماله ياخويا …. يجوز برضه

الشهادة لله … كل التنظيفات السابقة كوم … والمرة دي كوم تاني … عمر ماحد نظفهم بالطريقة دي … ساعة كاملة على الجزء التحتاني وزيها على الفوقاني .. من غير ماتتوقف لحظة …. وبعد ماخلصت … ورتني الأشعة وقالت شايف الطبقات الداكنة دي حوالين الجزء السفلي من الأسنان … دي كلها طبقات متكونة من فترات طويلة .. ماحدش كان بيجي جنبها بذمة وضمير …. علشان كده تكونت بالشكل الكثيف ده …. 

قلتلها ماشي ياستي … ربنا يسامحهم بقى …. بس كان نفسي اطلب منها تعملي اشعة تاني وتوريني شكل أسناني ايه بعد اللي هي عملته … وهل المناطق الداكنة دي اختفت فعلا … والا الحكاية نفس حكاية عمنا الحلاق اللي حكيتلكم عنه في الأول ؟؟؟؟؟

بس أشعة تاني ليه … دي بتكلف شوية وشويات …. الطيب أحسن برضه …..

وطلعت وانا باغني ….

مواطن … ومخبر …….. وحرااااااااااااااااااااااااااااااامي

هذه المقالة كُتبت ضمن التصنيف الصحة في كندا. الوسوم: , . أضف الرابط الدائم إلى المفضّلة.

4 تعليقات على: الميكانيكي والحلاق .. ودكتور الأسنان

  1. محمد عبد الرحمن حجازي كتب:

    الله يا باشمهندس عبد الرحمن على هذا الأسلوب الرائع في الكتابة الساخرة
    بالله استمر ولا تتوقف
    محمد

    • عبدالرحمن الطويل كتب:

      حبيب قلبي … شكرا على المجاملة … لما شاعرنا الرقيق .. ملك الكلمة والإحساس يجاملني بكلمتين حلوين كده … يبقى انا وصلت خلاص وهاصدق نفسي 🙂

      ربنا يسعدك يارب … مبسوط انك هنا

  2. mohamed كتب:

    السلام عليكم
    ازيك ياباشمهندس
    انا هادخل فى الموضوع درى
    لسه اول مرة افكر فى الهجرة
    عملت بحث لقيت مدونتك
    حبيت اسألك عن مقاطعة اسمها ساسكتشوان
    ايه رأيك فيها ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.