موبايلي البردان

أجواء البرد التي نعيشها منذ بداية نوفمبر الماضي مازالت مستمرة … أجواء منعشة ولذيذة … أحلى مافيها انك وانت طالع الصبح من البيت ومع أول شهيق … تحس ان نفسك بيتخنق وهتموت وماحدش سمّى عليك … احساس رائع طبعا … 

كل ده جميل ورائع وممتع … مشكلتي الوحيدة اللي جاي اكلمكم عنها .. موبايلي العزيز … اللي جايبه معايا من السعودية …. 

من أول الشتاء … والأجواء الرومانسية دي … كل ماكنت أمسك التليفون في الشارع … ألاقي التليفون قفل لوحده .. كنت فاكر في البداية ان البطارية خلاص بتموت … خصوصا ان المؤشر غالبا بيكون أقل من 30% .. فقلت خلاص الحكاية واضحة وبطاريتك يا آيفوني في الباي باي … 

من كام يوم .. بارد على تليفون وانا ماشي في الشارع … والحرارة -30 … والبطارية فوق ال 85% … تفاجأت ان التليفون قفل هو كمان … يادي النيلة .. مالك ياعمنا زعلان ليه وانت شحنك في العلالي … 

اكتشفت الحقيقة المرة … موبايلي حبيبي … لما بيتعرّض لدرجات حرارة أقل من 25 تحت الصفر … مابيستحملش … وبيبرد ياعيني … وبيقفل … والحل انك تخليه دافي بشكل مستمر … 

ياترى ياهلترى … انت كمان ياللي عايش معايا أجواء البرد المنعشة دي … هل بيحصل معاك كده ؟ موبايلك مابيستحملش هو كمان … والا كلمة السر ان الموبايل ده من السعودية ؟

عموما .. شكله كده حان وقت التغيييير 

هذه المقالة كُتبت ضمن التصنيف الإتصالات في كندا. الوسوم: , . أضف الرابط الدائم إلى المفضّلة.

6 تعليقات على موبايلي البردان

  1. DrHala كتب:

    حلو فرصه للتغير الواح دائما بيتردد لما يحب يغير ويقعد يقول لنفسه بلاش نتبطر على نعمه ربنا وطالما شغال وكويس خلاص. كده الواحد يغير وضميره مستريح

    • عبدالرحمن الطويل كتب:

      معاكي حق يادكتورة … هو الواحد بيقعد يدور كده على أي حاجة تخليه يغير وهو مرتاح الضمير 🙂

  2. DrHala كتب:

    السلام عليكم ازيك يا باشمهندس
    كنت عاوزه اسالك لو حد تعرفه عندك له تجربه التقديم والدخول للجامعه
    يا ريت يفيدنى

    • عبدالرحمن الطويل كتب:

      وعليكم السلام ورحمة الله ..
      النهاردة تقابلت مع مجموعة من المصريين هنا في ساسكتون .. معظمهم من الجامعة … ياترى عايزاني اسألهم عن ايه وانا هاسألهم المرة الجاية .. معلش ماخدتش ارقامهم لسة .. فماعنديش فرصة اسألهم الا الشهر الجاي

  3. DrHala كتب:

    عاوزه اسالهم على طلبه الاى جى وهل لو الطالب محقق المتطلبات هل ده معناه انه لازم يقبل ولا القبول فيه تعقيدات اخرى
    وكمان تخصص الهندسه الكميائيه هلى فيه شروط اخرى للالتحاق به وهل الدارسه فيه كويسه ولا صعبه جدا
    جزاك الله كل خير

    • عبدالرحمن الطويل كتب:

      هابعتلك يادكتورة ايميل أحد طلبة الدكتوراة في الهندسة الميكانيكية هنا في جامعة ساسكتشوان … تسأليه عن كل اللي يخطر في بالك من أسئلة وإن شاء الله تكون الاجابات عنده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.