تأشيرة أمريكا … اجراءات الحصول عليها من كندا


http://www.abdutaweel.com/english/?p=164

اللي متابع معايا هيفنكر المعاناة اللي عانيتها علشان آخد التأشيرة الأمريكية وانا في السعودية .. الرابط أعلاه لآخر ماكتبت بهذا الخصوص وقتها …

الشهر اللي فات قررت اني أقدم على التأشيرة الأمريكية من هنا … ونشوف هيحصل ايه …

الخطوات هي نفس الخطوات … تدخل على الموقع بتاعهم .. تملى البيانات .. وترفع صورة ليك حديثة تم التقاطها في خلال الستة أشهر الأخيرة … وتدفع ال 160 دولار … وتحجز موعد في أقرب قنصلية أمريكية ليك …

أقرب قنصلية أمريكية ليا موجودة في مدينة كالجري … ساعة طيران .. وستة ساعات بالعربية ….. وأقرب موعد كان النهاردة … 16 يناير … 2015

ركبت الطيارة امبارح وطرت على كالجري وانا مش معايا غير جواز السفر بتاعي .. ونموذج ال DS160 بتاعهم … حتى تأكيد الموعد بتاعي نسيت اطبعه … أخدت شنطتي على كتفي وركبت الطيارة …. والصبح طلعت على القنصلية .. الموجودة في المبنى اللي في الصورة أعلاه .. وطبعا الصورة أعلاه مش من تصويري 

الحجز عن طريق Expedia  … استفادة ببعض النقاط اللي ليا مع كرت الفيزا بتاعي عند TD Canad 

حجز الطيران مع الفندق في نفس الوقت … شفت فندق جنب عنوان القنصلية … 10 دقايق مشي … وتوكلت على الله 

النهاردة الصبح رحت قبل الموعد بربع ساعة … هم بيقولولك في ورقة تأكيد الموعد ماتروحش قبلها ب 20 دقيقة والا هيقولولك امشي وتعالى في موعدك … 

الدنيا كانت زحمة … فوقفت مستني الدور … كان لس بيدخلوا الناس اللي قبل موعدي بربع ساعة .. هم مواعيدهم كل ربع ساعة … وانا واقف افتكرت ان ورقة تأكيد الموعد مش موجودة معايا … كان في محل في نفس المبنى فيه تصوير ونت … فدخلت وطبعت الموعد .. خمسة دولار حارة ونار في جتتهم 😀 … لأن ماحدش سأل عنها أصلا ولا اهتم بيها .. ماعلينا

جا الدور علينا … شيكوا على النموذج DS160 … والجواز .. وبطاقة الإقامة … الصورة قالولي شكلها مش هتمشي .. لكن ادخل خلص الإجراءات الأمنية … ولما تطلع للمكاتب هم يتفاهموا معاك … وفعلا تم التفتيش … ممنوع أي حاجة الكترونية … او أي شنط كبيرة معاك … لو معاك حاجة زي كده هيدلوك ورقة تاخدها لمكان أمانات بعيد شوية تحط فيها حاجتك وترجع … 

انا كنت عارف الكلام ده فكنت سايب كل حاجة في الفندق … 

خلصنا الإجراءات الأمنية .. أخذونا للمكاتب فوق في الدور العاشر … اللي على الشباك ماعجبتهاش الصورة … أخدوا البصمات .. وقالولي روح هات صورة حديثة …

نزلت للمحل اللي لسة واخد مني خمسة دلاور ده .. علشان يعملي صورتين بعشرين دولار … في جتتهم برضه 😀 …

ورجعت تاني للتفتيش الأمني .. بس المرة دي من غير انتظار .. سريع سريع طلعت للمكاتب … ودخلت على المقابلة على طول … شوية أسئلة من النوع

رايح هناك ليه

بقالك كام في كندا

تخصصك العلمي ايه

بحث الماجستير بتاعك كان عن إيه 

وكل شوية .. قلتلي من مواليد فين .. السعودية …. 

وفي النهاية .. ابتسامة جميلة .. ومبروك الطلب تم قبوله … وهيوصلك جوازك وعليه التأشيرة عالبريد خلال أسبوع …

وخلصت الحكاية على خير والحمد لله .. وعدنا إلى أرض الوطن سالمين .. قصدي أرض ساسكتون …

Facebook Comments
It's only fair to share...Share on FacebookShare on Google+Tweet about this on TwitterShare on LinkedIn
هذه المقالة كُتبت في التصنيف تأشيرة أمريكا. أضف الرابط الدائم إلى المفضلة.

  1. ألف مبروك التأشيرة 🙂
    الجميل إنها بتسنف أسطورة إن اللي معاه بي آر كندا مستحيل قنصلية تديله الفيزا وإن الأفضل للي نفسه يزور أمريكا إنه يجيب عليها فيزا أمريكا قبل ما تطبع عليها فيزا كندا

    • عبدالرحمن الطويل كتب:


      الله يبارك فيك يارب …
      معاك حق .. اللي خلاني اقدم وقتها في السعودية الجملة اللي انت قلتها دي …

      مستحيل انك تطلعها من كندا لو عملت اراجوز كمان .. وطلعت في الاخر اسطورة زي منت قلت

  2. BigMack كتب:

    السلام عليكم،
    واحشنا من ايام البر الثاني 🙂
    تجربة مميزة. يا ريت لو تحكيلنا لما تستلم الجواز، كم مدة الفيزا وهل هيا متعددة.
    وشكرا

    • عبدالرحمن الطويل كتب:

      يااهلا يااهلا … يمكن الاسم متلخبط عليا .. لكن أهلا بيك وسهلا دائما وأبدا

      أنا فعلت أخدت التأشيرة واستلمت الجواز يوم الأربعاء على طول اللي بعدها .. وصلني لغاية عندي

      وهيا متعددة لمدة عشر سنوات

      • BigMack كتب:

        تحية عطرة من أيام المطاريد 🙂
        ما اشاء الله ، 10 سنين، يعني احسن من الي كنت حتاخذها من السعودية.
        شكرا على المعلومات القيمة

  3. عثمان كتب:

    جزاك الله خيرا

    1- الصورة لمبنى مجاور وليست للعمارة التي بها السفارة

    2- فورم d160 اذا ما طبعت الكونفيرميشن من اول بتتعب تحصلها ثاني

    3- بعد السيكوريتي الامور تمام ، معظم الناس جابت جوالاتها و عملوا لهم حكاية ، ومجموعة أخرى نسيوا البيرميت أو الفيزا ريكورد الكندي

    جزاك الله خيرا سردك شافي و وافي

  4. rrrob كتب:

    مرحبا ممكن استفسر كنك اذا انت مقيم او زائر لكندا
    و هل ارتفضت لك فيزا من السعودية مسبقا و هل فعلا المطلوب انك اتقدم كن مكان بلد الاقامة !
    شكرا

    • عبدالرحمن الطويل كتب:


      مقيم في كندا
      ولأ .. لم يتم رفض الفيزا لي من السعودية ..
      وأعتقد ان المطلوب انك تقدم من بلد الإقامة … لكن أنصحك تشوف الموقع بتاعهم يمكن يكون فيه طريقة للزائر أيضا

  5. محمد يسري كتب:

    انا محمد عايش في الامارات ومعايا فيزا الي كندا 6 سنوات ممكن احصل علي فيزا امريكا من كندا مع العلم اني تم الرفض مرتنين مره 1 8 2015 15 11 2015 الرفض b214 وانا مسافر الي كندا ان شاء الله 1 12 2015 ارجو الرد وشكرا للجميع

  6. ابو علي كتب:

    استاذ عبد الرحمن
    هل يجب مقابلة موظف\ة القنصلية للزوجين ام الزوج وحده ؟
    هل يتوجب تقديم طلب مشترك للعائلة ؟ و ما هو الموقع المعتمد بسببب وجود مواقع عدة على الانترنت
    مع جزيل الشكر

  7. Amina كتب:

    أستاذ عبدالرحمن
    انا انتهت فيزتي الكنديه وتم رفع الطلب للتجديد وفِي انتظار الرد ولكن تأخرت وعندي موعد فيزا امريكيه هل لازم اكنسل على موعد الفيزا الامريكيه ولا ماتفرق اذا معايا بيرمنت يمشوها ؟
    شكرا لك ومبروك على الفيزا 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *