اللي مالوش ماضي … مالوش حاضر …

وأخيرا … تحركنا خطوة في اتجاه رخصة الهندسة الإحترافية الكندية … Peng 

لمن لا يعلم .. الهندسة مهنة مقننة او منظمة “Regulated” في كندا … معناها إنك لازم تحصل على الرخصة في الأول قبل ماتقدر تمارس المهنة … نفس الحال بينطبق على مهن تانية كتير .. زي الطب مثلا …

الطالب لما بيتخرج من كلية الهندسة .. أو المهندس المهاجر الجديد إلى كندا بيبعت شهاداته إلى زي ماتقول كده نقابة الهندسة .. وتقدم طلب انك تكون “مهندس تحت التدريب” … بعد الموافقة على طلبك بيبقى ليك الأحقية انك تشتغل في مجالك بس تحت إشراف مهندس معتمد أو زي مابيسموه مهندس محترف … ومع نهاية كل سنة بتقدم تقرير خبرة ليهم لإعتماد الخبرة بتاعتك … مطلوب منك 48 شهر خبرة .. بعد إعتمادهم بتكون خلصت الجزء ده … باقي جزء تاني وهو اجتياز امتحان Professional Practice Exam … وده بيكون امتحان في أخلاق المهنة وممارساتها والقانون المتعلق بالمهنة بتاعتك … علشان بكرة لما تغلط ماتقولش ماكنتش عارف …

نسيت أقول … إن المهندس المهاجر .. مسموح ليه انه يقدم تقارير خاصة بخبراته السابقة خارج كندا بحد أقصى 3 سنوات من الأربعة المطلوبة .. يعني لازم تاخد خبرة سنة على الأقل في كندا مهما كانت عدد سنين الخبرة بتاعتك برة كندا

كل مقاطعة ليها نقابة الهندسة الخاصة بيها … وكل نقابة ليها شروطها وطريقتها للحصول على الرخصة .. لكن بعد ماتحصل على الرخصة من مقاطعة … تقدر تستخدمها في جميع أنحاء كندا

أعلاه كان الشرح …. بالنسبة لي بقى … فأنا أخيرا تحركت خطوة في اتجاه الرخصة بتاعتي ….

لما نزلت كندا قدمت طلب لنقابة الهندسة اللي في أونتاريو … ليهم نموذج خاص بيهم للخبرات وبالمقررات الدراسية .. الخ الخ … خلصت المطلوب وبعته ليهم .. وقبلوني ك مهندس تحت التدريب …. وطلبوا مني اجتياز الإمتحان وتقديم تقرير عن السنة اللي فيها الخبرة في سوق العمل الكندي

بما إني نقلت على ساسكتون سريع سريع … فماهتمتش بيهم … وانشغلت بوظيفتي … بس افتكرت اني ابعتلهم عنواني الجديد … بعد سنة بعتولي تذكير بالإمتحان … فانا قلت خليني اخلص من دوشتهم واشوف نقابة المهندسين الساسكتشوانية …. وبالفعل قدمت طلب … وبعتولي بالموافقة على اعتمادي كمهندس تحت التدريب نقلا من اونتاريو … بس … قالولي ان الخبرات بتاعتي مش هيعتمدوها لأنها مش مطابقة للشروط بتاعتهم … ومعناها اني لازم اكتبها تاني بالطريقة الجديدة … وفوق كده لازم ابعتها لمديري المباشر علشان يوقع عليها … ولو ماكنش مديري المباشر معتمد هندسيا في البلد اللي كنت فيها … فلازم يكون فيه مشرف هندسي معتمد … واذا مافيش تقدم طلب ليهم وهم يخصصولك واحد يساعدك ويتواصل مع مديرك ويوقع على تقرير الخبرة بتاعك في اللآخر …

طبعا لقيت الحكاية فيها طلبات ودوشة … فقلت لنفسي بعدين …. عدت سنة … والثانية … وانا ماعملتش حاجة … لغاية مازهقت من نفسي وقلت لازم اخلص بقى من الحكاية دي …. 

وقد كان … أخيرا سلمت النهاردة 3 تقارير عن 3 سنوات خبرة سابقة …. والحمد لله ان مديري مهندس … وتوقيعه لوحده كفاية …

فيه لجنة بتراجع التقرير وبتبدي رأيها فيه … نقول يامسهل .. هاعرف في 4 يناير إن شاء الله 

اللي تعلمته من الحكاية دي كلها … حاجة وحدة بس 

خلي علاقتك طيبة مع مدراءك وزملاءك السابقين وانت جاي لكندا … هتحتاجهم هتحتاجهم … في كندا .. اللي مالوش ماضي  .. مالوش حاضر …

هذه المقالة كُتبت ضمن التصنيف معادلة الشهادات و النقابات. الوسوم: . أضف الرابط الدائم إلى المفضّلة.

4 تعليقات على اللي مالوش ماضي … مالوش حاضر …

  1. ابو علي كتب:

    شكرا على مشاركة المعلومات بس لو سمحت ممكن تقلنا عن تحضير الورق يعني فين نعمل نسخ عن اوراقنا
    certified as a true copy of the original
    للشهادات الجامعية من خارج كندا او اي اوراق اخرى و ما هي التكلفة؟

  2. ابو علي كتب:

    استاذ عبد الرحمن
    ادعو لك بالتوفيق لك و لاسرتك لكل افادة تقدمها لنا و لزمايلك البشمهندسين الضعفاء
    :: لو ممكن توضيح .. افهم من كلامك انك طلبت من مدراءك السابقين قبل وصولك لكندا انهم يكتبولك تقارير تثبت خبرتك الهندسية ؟ طيب افرض حد منهم سافر او ترك الشغل او اتغيرت الادارة او الشركة اتقفلت .. ما هو الحل؟ لاني في حالتي تغيرت الادارة و ملكية الشركة في عملي السابق … فهل ممكن اثبات الخبرة عن طريق زميل في القسم يعني مش مدير ؟
    مع الف شكر لحضرتك

    • عبدالرحمن الطويل كتب:


      انا طلبت فعلا من مديري السابق انه يوقع على الورق .. وده حصل ..

      عموما لو ماتقدرش توصله .. بتكلمهم هنا وبتشرحلهم الوضع وهم بيتعاملوا مع كل حالة لوحدها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.