Transitapp … هو الباص بتاعي فين

في السعودية … كان ومازال نظام المواصلات العامة مش فعال بشكل كبير … ماتقدرش تعتمد عليه في مشاويرك … وبيخدم مناطق محددة …. في النهاية بتضطر تستخدم عربيات الأجرة … أو تشوف حد من أصحابك تتذلّ ليه لغاية ماياخدك مشوارك …

مصر … العكس … الناس أصلا عايشة على المواصلات العامة … بكل مشاكلها … الباصات والميكرو والميني باص والميترو والقطورات والتروماي … الخ الخ … ولو كل ده مانفعش .. التاكسي في كل مكان ومش غالي جدا …. 

لما جيت كندا … ونزلت في تورونتو … لقيت نظام مواصلات زي مصر … الميترو والباصات … في كل مكان تقريبا … فرق الأسعار أكيد .. بس الخدمة موجودة في كل مكان تقريبا …. من حظي الجميل اني اخترت أسكن في منطقة مافيهاش غير الباصات … بس برضه كان التنقل للي مش معاه عربية متاح جدا … ومش متعب زي السعودية …. 

في ساسكتون … اختلف الوضع … واقتربنا أكثر من أيام السعودية …. مافيش مواصلات عامة غير الباصات … ومش موجودة في كل مكان بشكل مستمر …. علشان اطلع من مكان واروح لمكان تاني .. بالعربية ممكن تاخد ربع ساعة … لكن بالباص ممكن تاخد ساعتين … مش علشان زحمة .. علشان لازم تركب أكثر من باص … 

حظي المرة دي خلاني أسكن في مكان بيعدي عليه باص بيروح لغاية مكان شغلي … مافيش أحسن من كده … وانا باختار البيت ماجاش في دماغي أبدا الموضوع ده … المهم وبما أن المواقف في منطقة وسط البلد … اللي فيها شغلي … تقريبا مستحيلة … وغالية جدا …. لقيت الباص أحسن حل لي … 45 دقيقة أكون في مكتبي … مقارنة ب 25 دقيقة لو رحت بعربيتي .. مش فرق كبير يعني …. 

المشكلة اللي كانت بتواجهني … الحاجة اللي الناس برة كندا فاكرين انها مابتحصلش هنا …انك ممكن تقعد تستنى الباص في موعده … ومايجيش .. يتأخر … يجي بدري … مايجيش خالص …. أي حاجة ممكن تحصل …. طبعا في الصيف .. بتكون المصيبة أخف … لكن في الشتا … وفي سالب 40 … وانت مستنى في الباص اللي مش باين ليه صاحب ده …. مشكلة المشاكل …. كنت أحيانا كثيرة لو تأخر دقيقتين بس .. أخد عربيتي واطنشه .. بس اللي مش معاه عربية كان ممكن يعمل ايه ؟؟؟

ربنا فتحها عليهم مؤخرا … والموضوع ده انحل بتاتا …. شريحة في كل باص … معروف مكانه فين …. وبرنامج عليه معلومات الباص وخط سيره … وهو فين دلوقتي ….. وكمان بيقولك تطلع من بيتك امتى علشان تلحقه …. 

شيء مريح جدا … معرفش اذا هو موجود في بقية مدن كندا أو لأ …. لكن من يوم مانزلت البرنامج ده على جهازي … وانا مابقتش أستنى الباص خالص .. باطلع قبل مايوصل بأقل من دقيقة … وارتحنا من البرد والتجمد …. وكمان الحشرات في الصيف 

البرنامج هو 

https://transitapp.com/

هذه المقالة كُتبت ضمن التصنيف المواصلات في كندا. الوسوم: , . أضف الرابط الدائم إلى المفضّلة.

تعليقان على Transitapp … هو الباص بتاعي فين

  1. Nour كتب:

    ربنا يباركلك استفدت من حضرتك كتير
    بالنسبه لخط التليفون افضل شركه مين والافضل تشتري من ساسكتون ولا ناخد الي معانا من مصر؟

    • عبدالرحمن الطويل كتب:

      الأفضل تشتري ايه … خط تليفون والا جهاز تليفون ؟

      عموما لما توصلوا بالسلامة تدوروا على العرض الأحسن .. كلهم شركات كويسة بس على حسب العروض الموجودة وقت الشراء …

      طبعا لو قصدك تجيبي خط تليفون من مصر وتستخدميه هنا ..فطبعا ده هيبقى شيء مكلف جدا .. خط التليفون من هنا أحسن حل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.