Child Passport Application – Canada … التقديم على جواز السفر للطفل – كندا

جبت البيبي …. وحلقة دهب في وداناتك .. واسمع كلام بابا ماتسمعش كلام ماما … وكل الكلام الجميل ده … وزي ماقلنا قبل كده .. مليت الورق الخاص بتسجيل البيبي في المستشفى قبل ماتطلع … ورجعت بحمد الله وسلامته مع البيبي للبيت …

وانت بتبتدي حياتك الجديدة مع البيبي … هيوصلك على عنوان المراسلات بتاعك وفي خلال اسبوعين 3 حاجات: 
1- بطاقة التأمين الصحي – Health Card
2- بطاقة التأمين الإجتماعي – SIN
3- شهادة الميلاد – Long Birth Certificate
كل وحدة منهم بتيجي من مكان مختلف .. فبتوصل لوحدها .. مش هيجولك مرة وحدة … 

الخطوة الجاية بتكون التقديم على جواز السفر الكندي الخاص بالبيبي …. والموضوع سهل وبسيط … هتحتاج 5 حاجات:

1-Long Birth Certificate
شهادة الميلاد اللي لسة واصلاك قبل كام سطر فوق … يبدو ان فيه نوعين من شهادات الميلاد .. نوع مذكور فيه اسم الأب والأم … ونوع من غير إسم الأب والأم … Long and Short Birth Certificates  … المطلوب علشان جواز السفر الشهادة اللي فيها اسم الوالدين .. Long Birth Certificate … وهي غالبا اللي بتجيك البيت .. محتاج الأصل معاك مش مجرد صورة … والأصل هيرجعلك تاني .. لا تقلق … 

2- Guarantor … ضامن
محتاج حد يكون يعرفك لمدة سنتين على الأقل … لازم يكون كندي .. معاه جواز كندي … بيصادق على المعلومات اللي انت كاتبها … وبيصادق على إن البيبي ده ابنك او بنتك فعلا … الضامن ده بيعمل حاجتين ..
– بيكتب بياناته في الطلب بتاع جواز السفر … وبيوقع عليه
– بيوقع خلف صورة البيبي بما يفيد بأن البيبي اللي في الصورة هو نفسه صاحب الطلب ..  
لو ماكنتش تعرف حد كندي .. أو بقالك في كندا فترة أقل من سنتين … فيه نموذج رقمه PPTC 132 … هتلاقيه في مكاتب الجوازات … هتاخده وتملاه … وهتحتاج توثيق وحلفان ودوشة بقى 

3-  هتصور البيبي صورتين .. مواصفات الصور هتلاقيها في طلب جواز السفر .. وكمان أي ستوديو تصوير بيكون عارف المواصفات كويس … ولازم تتأكد ان خلفية صورة من الصورتين عليها الآتي:
– تاريخ الصورة
– اسم البيبي
– توقيع الضامن 
الصيغة موجودة في طلب جواز السفر .. استخدمها نفسها
طبعا الصورة في العادة لازم يكون صاحبها مش مبتسم .. ووجهه مستقيم وعنيه مفتوحه وودانه واضحة .. لكن الجماعة بيتفهموا ان الحاجات دي صعبة مع البيبي … فبيمشوا .. بس المهم ان مافيش أصابع تكون باينة في الصورة … والعيون مفتوحة قدر الإمكان .. والوجه مستقيم برضه قدر الإمكان …

4- تعبئة طلب جواز سفر للبيبي … هتلاقيه في الصفحة دي … 
الطلب عبارة عن سبع أقسام … 
– الأول: بيانات البيبي .. اسمه وتاريخ ميلاد وجنسه وعنوان السكن ولون العين والشعر والطول والوزن
– الثاني: بيانات مقدم الطلب … اللي المفروض انه أحد الوالدين … وكمان بيانات الطرف الثاني … والإثنين لازم يمضوا على الطلب .. 
– الثالث: غالبا مش هتحتاجه مع البيبي الجديد … القسم ده بيسأل لو الطفل تم اصدار وثيقة سفر كندية ليه في السابق وبيطلب معلوماتها لو كانت موجودة 
– الرابع: بيانات الوثيقة اللي بتثبت جنسية الطفل الكندية .. شهادة الميلاد في حالاتنا .. هتكتب رقمها وتاريخ إصدارها … 
– الخامس: تعهد مقدم الطلب بصحة المعلومات
-السادس: معلومات الضامن وتعهده بصحة المعلومات
-السابع: معلومات الإتصال في حال الطوارئ .. لو حابب … مش ضرورية .. .

5- آخر حاجة .. الفلوس … 57 دولار لو انت مقدم في كندا .. و 100 دولار لو انت مقدم من أمريكا … وصلاحية الجواز خمس سنوات … 

بكده انت جاهز انك تقدم طلب جواز السفر للبيبي …. ممكن تقدم الطلب عن طريق البريد … وهتلاقي العنوان بتاعهم في الطلب موجود … او ممكن تروح بنفسك لمكتب من مكاتب الجوازات المنتشرة … هتلاقي أقرب مكتب ليك في اللينك ده .. اضغط هنا

ومبروك .. اسبوعين زمان والجواز يوصل لغاية البيت عندك إن شاء الله .. لازم يكون فيه حد في البيت علشان يستلمه ويمضي على ذلك … واذا مافيش حد هيسيبوا ليك ورقة تاخدها لمركز البريد المحدد ليك فيها وتروح تستلمه من هناك … 

شوية حاجات تاخد بالك منها … 
1- لو الأب والأم منفصلين أو مطلقين … لازم تقدم الأوراق اللي بتثبت الكلام ده مع الطلب … وطبعا اللي معاه الحضانة هو اللي بيقدم … ولو الحضانة مشتركة يبقى أي حد يقدم
2- لو رحت تقدم الطلب بنفسك … ماتنساش تاخد معاك إثبات شخصية فيها صورتك … يعني رخصة قيادة مثلا .. 
3- برضه ماتنساش انهم مابيقبلوش كاش .. لازم يكون معاك كريديت او ديبت كارد 

وماتناس في النهاية تقول للبيبي 

اوعى تسمع كلام ماما .. واسمع كلام ابوك 🙂

هذه المقالة كُتبت ضمن التصنيف المستندات الكندية. الوسوم: , , . أضف الرابط الدائم إلى المفضّلة.

5 تعليقات على Child Passport Application – Canada … التقديم على جواز السفر للطفل – كندا

  1. DrHala كتب:

    ربنا يكرمك يا باشمهندس على كل التفاصيل دى وربنا يبارك لك فى مولودتك الجميله

  2. حسن مكاوي كتب:

    ربنا يبارك لك في المولوده الجديده وتكون من عباد الله الصالحين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.