خطوة ورى خطوة .. والمشوار يقترب من نهايته

وانتهت الخطوة الخامسة من خطوات الحصول على الجنسية الكندية

تعالوا كده نراجع مع بعض الخطوات اللي انتهت إلى الآن:

1- يوم 3 يناير 2017
تجهيز الملف والوثائق المطلوبة بعد استيفاء جميع الشروط وارساله إلى إدارة الهجرة والجوازات. انا اخترت اني ارسله عن طريق ال UPS

2- يوم 6 يناير 2017
وصول الملف سالما إلى إدارة الهجرة والجوازات في مدينة سيدني في مقاطعة نوفا سكوتشيا.. المعلومة دي عن طريق موقع ال UPS

3- يوم 23 يناير 2017
وصلني ايميل منفصل لكل فرد من أفراد العائلة بالتأكيد على أن إدارة الهجرة والجوازات قد استلمت ملفي بالفعل يوم 6 يناير ..
غالبا … بيتم التأكد من أن جميع الأوراق المطلوبة موجودة .. بدون فحص أو تمحيص .. المهم التأكد ان الملف كامل … لو فيه ورقة ناقصة بيتم إعادة الملف لصاحبه .. وبما إن ملفي عائلي .. فأي ورقة ناقصة فأي حد فينا كانت هتتسبب في إرجاع الملف كله.
من المشاكل: الصورة مش حسب المواصفات او مش مكتوب عليها التاريخ واسم الستوديو واسم صاحب الصورة … توقيع ناقص في نموذج من النماذج .. مافيش مايثبت اللغة … يعني حاجات زي كده

4- يوم 24 يناير 2017
ملفي الاون لاين في موقعهم اتفتح …
عندهم موقع تقدر تشوف فيه حالة الملف بتاعك .. وقائمة بالمراسلات وتواريخها .. يعني علشان لو شفت اون لاين انهم بيقولوا انهم بعتول حاجة ليك لكن في الحقيقة مافيش حاجة وصلت تقدر تكلمهم وتشوف راحت فين او تطلب يبعتوها مرة تانية ..
كان مكتوب في الموقع اول مافتح ..
We received your application for Canadian citizenship (grant of citizenship) on January 6, 2017.
We sent you correspondence acknowledging receipt of your application(s), and a study book called Discover Canada on January 23, 2017.

5- يوم 2 فبراير 2017
انضاف سطر جديد في ملفي على موقعهم الإلكتروني
We started processing your application on February 1, 2017.

وده معناه والله أعلم ان الموظف المسؤول عن ملفي في ساسكتون وصله الملف وهيبدا بقى التدقيق والتمحيص …

الخطوة الجاية …
حسب قراءاتي .. فيه حاجة من 3 ممكن تحصل:
1- دعوة لحضور امتحان المعرفة … وده معناه ان مافيش قلق كبير تجاه ورقك .. ممكن يكون لسة عندهم شوية استفسارات .. توضيحات يعني .. ولو ده اللي حاصل فهيسألوك الإسئلة بتاعتهم وقت المقابلة اللي بتكون بعد الإمتحان
2- يبعتوا يطلبوا منك تعمل فيش وتشبيه .. بصمات الأصابع .. ومعرفش بصراحة ايه الحالات الي بتخليهم يطلبوا حاجة زي كده ؟ بس الموضوع ده بيأخر طلبك حوالي شهرين زمان …
3- الجماعة شايفين مشاكل في ورقك .. كلامك متناقض .. معلوماتك غلط … يعني .. ماارتاحوش لملفك … ووقتها هيطلبوا منك مايسمى ب Residency Questionnaire … ولو حصلت الحكاية دي يبقى ربنا يعينك … ربنا يبعدنا واللي بيقروا عن الموضوع ده .. الحكاية دي عاملة زي الكعب الداير كده .. كل ورقة مااحتفظتش بيها من يوم دخولك كندا ختبقى مطلوبة دلوقتي … النموذج ده فيه اسئلة تقريبا بتغطي كل يوم ليك في كندا .. مع ضرورة ارفاق مايثبت كلامك …

 

هذه المقالة كُتبت ضمن التصنيف إجراءات الجنسية ومراحلها. الوسوم: . أضف الرابط الدائم إلى المفضّلة.

تعليق واحد على: خطوة ورى خطوة .. والمشوار يقترب من نهايته

  1. تنبيه: فيش و تشبيه .. كندي …. اظهر وبان عليك الأمان | الطريق إلى المجهول – عبدالرحمن الطويل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.