Bill C-6 .. آخر الأخبار بخصوص قانون الجنسية الكندي الجديد

قريبا جدا سنحتفل بمرور عام كامل على إطلاق مشروع Bill C-6 داخل أورقة البرلمان الكندي … عام كامل ولم يتم الإنتهاء من التداول والمناقشة الخاصة بقانون الجنسية الجديد … 

اللي مش عارف انا باتكلم عن ايه .. ياريت يبحث في المدونة بتاعتي عن C-6  ..

طيب .. ايه الوضع الآن … وصلنا لفين … والحكاية دي متوقع انها تخلص امتى ؟؟ أعتقد ان المهتمين بالموضوع شافوا كلام كثير عن موعد تطبيق القانون … واللي كان بيقول قبل الكريسمس .. واللي كان بيقول بداية السنة … الخ الخ ….. الحقيقة ان كل دي تكهنات … وان اللي متابع الجلسات بجد يعرف ان الموضوع مش سهل … وشكله كده مطول شوية … شخصيا هاكون متفاجئ لو تم اعتماد القانون قبل شهر يونيو 2017 … 

في يوم 15 ديسمبر 2016 .. وفي جلسته رقم 89 .. وبعد 8 مناقشات في جلسات مختلفة .. تم إعتماد القانون في قراءته الثانية في مجلس الشيوخ …  وتم تحويل الموضوع إلى لجنة خاصة داخل مجلس الشيوخ للمزيد من البحث والمناقشات

واليوم … 6 فبراير 2017 .. وبعد اجازة 6 أسابيع من 15 ديسمبر إلى 31 يناير …  لم تبدأ اللجنة بعد في مناقشة القانون … وجدول اجتماعها لهذا الأسبوع لا يشمل بنوده هذا القانون … عندهم حاجات تانية أهم بيناقشوها .. واللي هي … طبيعة عمل الرجال الآليين “الروبوت” في مجال الصحة في كندا … جلسات الأسبوع ده مخصصة لبحث هذا الموضوع الهام .. وياعالم هيخلصوا منه الأسبوع ده والا هيضطروا يمددوا الجلسات للأسبوع القادم واللي بعده … الله أعلم … 

طيب هو ايه اللي باقي على القانون ده علشان يتم اعتماده … ؟؟؟ 

1- الإنتهاء من مناقشته في اللجنة … ورفع التوصيات والتعديلات إلى مجلس الشيوخ … 
2- عرض التوصيات على مجلس الشيوخ والتصويت على قبول التعديلات إن وُجدت من عدمه … 
3- القراءة الثالثة للقانون داخل مجلس الشيوخ
لو تمت الموافقة على القانون فمش هيتبقى الا الموافقة السامية لمندوب جلالة الملكة … 
اما لو تم رفض القانون واقتراح تعديلات عليه … فسيتم إعادة القانون لمجلس العموم … اللي لازم يناقش التعديلات المقترحة .. 
وافق على التعديلات المقترحة كلها .. يبقى تمام .. ترجع لمجلس الشيوخ والكل حبايب ويتم عرضه على المقام السامي … 
وافقوا على بعض التعديلات ورفضوا بعضها .. يرجع الموضوع لمجلس الشيوخ تاني علشان يناقشوا رد مجلس العموم … 
مجلس الشيوخ وافق على رد مجلس العموم … يبقوا حبايب والموضوع انتهى ويتم عرضه على المقام السامي
مجلس الشيوخ ماعجبوش الرد ومصر على بعض التعديلات اللي رفضها مجلس العموم .. هيرجع القانون تاني لمجلس العموم … ونقعد احنا بقى في الدائرة دي لغاية ماتحصل حاجة من الاثنين … 
ياالاثنين يوافقوا على صيغة معينة للقانون … 
او تنتهي الدورة البرلمانية من دون أن يتم التوصل لصيغة قانون قابلة للتطبيق والرفع للمقام السامي …. وبكده يصبح الموضوع في يد الدورة الجديدة للبرلمان … الشخوص هتتغير وقتها والقرارات ممكن تتغير معاها … واللي كان مرفوض امبارح ممكن جدا يكون مقبول النهاردة … والعكس صحيح ..

زي ماقلت فوق … الموضوع شائك ومش سهل … وهاكون متفاجئ جدا لو تم اعتماد القانون قبل يونيو 2017 …

ده لو تم اعتماد القانون أصلا  

هذه المقالة كُتبت ضمن التصنيف قوانين الهجرة والجنسية. الوسوم: , , , , . أضف الرابط الدائم إلى المفضّلة.

4 تعليقات على Bill C-6 .. آخر الأخبار بخصوص قانون الجنسية الكندي الجديد

  1. Nour كتب:

    السلام عليكم يا بشمهندس
    محتاج مشورتك في أماكن السكن في ساسكتون, طبعا انا بدور في الشرق ذي ما حضرتك قلتلي قبل كده .
    انا بدور علي شقه لقيت اماكن كتير فأيهم أفضل من حيث توافر الخدمات و الحضانات و الاتوبيس عشان مش هيبقي معانا عربيه في الأول
    Evergreen, Willowgrove, Rosewood, Stonebridge
    ايه احسن حاجه في دول ولو حضرتك عارف اماكن احسن ياريت تقولي

    • عبدالرحمن الطويل كتب:


      وعليكم السلام ورحمة الله

      كل المناطق الأربعة مناطق جديدة وجميلة .. بس موجودين في أطراف المدينة شوية .. والخدمات هتكون أقل مقارنة بغيرهم … كل ماتسكن حوالين الجامعة كل ماهتكون الخدمات أكتر .. دور في المنطقة اللي حدودها
      النهر غربا … الطريق الدائري السريع شرقا شارع الجامعة شمالا وشارع ٨ جنوبا

      لما افتح كمبيوتري هاعملك صورة للمنطقة واحطها هنا

      ده موقع الاتوبيسات بتاعتنا .. علشان تعرف ايه المحطات اللي جنبك وعدد الاتوبيسات اللي بيعدي عليها
      https://transit.saskatoon.ca/

  2. Nour كتب:

    جزاك الله خير بس ممكن تقولي اسماء اماكن معينه عشان اعرف ادور عليها في البحث عن شقه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.