فيش و تشبيه .. كندي …. اظهر وبان عليك الأمان

استكمالا لمشوار الحصول على الجنسية الكندية … واللي بدأت الكلام عنه سابقا في الموضوع ده

كنت قلتلكم ان اخد الخطوات الجاية كالآتي :
1- دعوة لحضور امتحان المعرفة … وده معناه ان مافيش قلق كبير تجاه ورقك .. ممكن يكون لسة عندهم شوية استفسارات .. توضيحات يعني .. ولو ده اللي حاصل فهيسألوك الإسئلة بتاعتهم وقت المقابلة اللي بتكون بعد الإمتحان
2- يبعتوا يطلبوا منك تعمل فيش وتشبيه .. بصمات الأصابع .. ومعرفش بصراحة ايه الحالات الي بتخليهم يطلبوا حاجة زي كده ؟ بس الموضوع ده بيأخر طلبك حوالي شهرين زمان …
3- الجماعة شايفين مشاكل في ورقك .. كلامك متناقض .. معلوماتك غلط … يعني .. ماارتاحوش لملفك … ووقتها هيطلبوا منك مايسمى ب Residency Questionnaire … ولو حصلت الحكاية دي يبقى ربنا يعينك … ربنا يبعدنا واللي بيقروا عن الموضوع ده .. الحكاية دي عاملة زي الكعب الداير كده .. كل ورقة مااحتفظتش بيها من يوم دخولك كندا ختبقى مطلوبة دلوقتي … النموذج ده فيه اسئلة تقريبا بتغطي كل يوم ليك في كندا .. مع ضرورة ارفاق مايثبت كلامك …

وفعلا وزي ماتوقعت ..

يوم الجمعة اللي فات .. يوم 17 فبراير .. أضافوا سطر جديد في حسابي على الأون لاين … بيقولوا فيه انهم بعتولي رسالة بريدية يوم 16 فبراير على البريد العادي … واني لازم اعمل المطلوب فيها حسب التعليمات … هم كده كلامهم مابيكونش شافي للقلب … 

النهاردة .. يوم 27 فبراير وصلت الرسالة بحمد الله وسلامته … في الأول كنت فاكر ان الرسالة هتوصل في يوم او اثنين .. لكن عدى يوم واثنين وثلاثة ومافيش حاجة وصلت … المهم وصلت بالسلامة النهاردة .. وسبب الوقت ده كله انها مبعوتة من فانكوفر .. مش من ساسكتون زي مانا توقعت … 

المطلوب .. اني اروح لأقرب مركز بوليس .. او أحد المراكز المشاركة .. وأعمل فيش وتشبيه الكتروني .. مش بصمة اصبع بالحبر يعني … والنتيجة نبعتها للعنوان بتاعهم في فانكوفر … وده كان التوقع التاني في التوقعات الثلاثة أعلاه …

بكرة ان شاء الله نروح نعملها ونرجع نستنى الخطوة القادمة .. واللي هي غالبا وحدة من الاثنين اللي باقيين في الثلاث توقعات أعلاه .. 

1- دعوة لحضور إمتحان المعرفة 
2- Residency Questionnaire

وياخبر النهاردة بفلوس … بكرة يبقى بإيه ؟؟؟؟؟ ببلاش 

هذه المقالة كُتبت ضمن التصنيف إجراءات الجنسية ومراحلها. الوسوم: , . أضف الرابط الدائم إلى المفضّلة.

8 تعليقات على: فيش و تشبيه .. كندي …. اظهر وبان عليك الأمان

  1. وليد كتب:

    السلام عليكم يا باشمهندس

    أتمنى لك كل التوفيق وتسمع أخبار سعدة قريب إن شاء الله وتكون أخيرا مواطن كندي 🙂
    ياريت تبقى تكتب موضوع عن ال Residency Questionnaire كمان.

    أنا أول مرة أعلق على البلوج لاكن متابع مواضيعك من فترة
    بصراحة انا سعيد جدا إن لينا سفير في ساسكاتشوان لأن فعلا تقريبا مافيش حد عامل مواضيع عن المقاطعة دي غيرك.
    انا لسة في مصر و في آخر مراحل النومينيشن إن شاء الله. أنا قدمت SINP OID يعني ورقي فامامي بتاع 9 شهور بإذن الرحمن أو يمكن أكتر حسب ماسمعت.

    أنا عندي إستفسارات كتيرة جدا عن ساسكاتشوان وبالأخص ساسكاتون. من اللي قريته بقيت قلقان جدا من موضوعين. معدل الجريمة العالي ومثال عن الموضوع دة الفيديو دة: https://youtu.be/lLXrNH4lXZc?t=161
    تاني حاجة طبعا اللي قريته عن الجو السيء جدا جدا اللي ساعت بؤدي لإكتئاب حسب ما سمعت من واحد هندي قعد مدة في ساسكاتون. انا هيكون معايا زوجتي و طفلين فبصراحق قلقان.

    بما إنك مقيم هناك طول المدة دي فكلامك بالنسبة لي مهم جدا و موثوق فيه.
    منتظر ردك
    ومع تمنياتي تاني بتخطي المرحلة دي و الحصول على الجنسية بإذن الرحمن بسهولة و يسر.

    • عبدالرحمن الطويل كتب:


      وعليكم السلام ورحمة الله … شكرا على الدعوات والأمنيات والمتابعة .. ربنا يسعدك

      ماعنديش بصراحة فكرة عن ال RQ ويارب ماانجبر اني ابحث عن معلومات خاصة بيه 🙂

      ربنا يوفقك وتخلص الإجراءات بسرعة .. انا بصراحة معرفش الفرق بين انواع النومينيشز … يمكن محتاجلي اقرا اكتر شوية في الموضوع ده …

      بالنسبة للأمان … مش عارف اقول ايه بصراحة .. الأرقام بتقول ان ساسكتون هي الأعلى .. بس برضه الأرقام بتقول ان الفرق مش كبير بين المدن يعني ….
      شوف كده الصفحة دي وتعرف على انواع الجرائم اللي عندنا
      https://map.saskatoonpolice.ca/

      بالنسبة للجو … فالشتا هنا تقريبا 6 أشهر … فيه ناس الفترة دي ممكن تعمل ليها اكتئاب فعلا … كل واحد بقى ونفسيته …. سمعت عن ناس حصل معاهم كده … بس الأغلب متعايش طبعا .. البلد فيها ربع مليون نسمة متعايشين

      اهلا وسهلا بيك دائما وأبدا

      • وليد كتب:

        أهلا بك تانس و شكرا على الرد
        بالنسبة للأمان ..لو قلنا بغض النظر عن الأرقام انت شخصيا من واقع تجربتك لمست دة فعلا؟ واجهك لاقدر الله اي واقعة؟
        انا سمعت ان العصابات منتشرة بسبب المخدرات و زيادة نسبة البطالة. وبالنسبة للصفح دي https://map.saskatoonpolice.ca/ انا فعلا كنت بصيت عليها قبل كدة ومفيدة جدا.

        بالنسبة للجو ، ممكن تقولي تجربتك انت برده. كمصري متعايش ولا متضايق وصابر لغاية لما ال6 شهور يدوا كل سنة ? 🙂

        بالتوفيق دائما وابقى طمنا عليك

        • عبدالرحمن الطويل كتب:


          صعب طبعا إني أوصف تجربتي في سطرين أو عشرة …

          علشان كده … انا كتبت على فترات مختلفة المشاعر بتاعتي بالنسبة للموضوع ده . هتلاقيها هنا

          http://www.abdutaweel.com/english/?cat=221

          شكرا لك

          • وليد كتب:

            انا فعلا قرأت كل مواضيع ساسكاتون على البلوج.
            مش باقولك متابع مستمر 🙂

            لا أنا أقصد تجربتك فيما كنت فعلا صادفت أي مشكلة أو موقف له علاقة بموضوع الأمن والأمان وما يقال عن ساسكاتون في هذا الشأن.

            مع الشكر

          • عبدالرحمن الطويل كتب:

            الحمد لله خلال فترة تواجدي في ساسكاتون ماحصلش معايا أي موقف يخليني أقلق على سلامتي أو سلامة الأسرة .. لا من بعيد ولا من قريب

            ربنا يكملها معانا على خير ويبعد عنا جميعا كل شر

  2. وليد كتب:

    آمين أخي الكريم
    ربنا يحفظك ويحفظ أسرتك دائما بحفظه و كنفع.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.