الضرائب الكندية … ياالدفع … ياالحبس .. وبلاش فهلوة

وحان وقت المحاسبة المالية …

في هذا الوقت من كل عام تلاقي كلمة الضرائب منتشرة حواليك … في الراديو والتلفزيون ومحادثات الناس … وفي الإعلانات المعلقة … الكل بيتكلم عن الضرائب … اللي عايز يساعد واللي عايز زبون يعمل الضرائب ليه واللي واللي ….
واللي بيسأل هو انا أقدر أعمله لوحدي .. واللي يسأل هو انا أصلا لازم أعمل واحد .. والناس اللي برة كندا والناس اللي مادخلتش كندا … كله بيسأل …. عالفتيحي كله رايح 🙂

تجربتي مع الضرائب بدأت في 2013 … بما إني عملت اللانيدينج بتاعي في يوليو 2012 … وكنت خالي شغل طوال 2012 .. بدون دخل يعني … فالموضوع كان سهل … رحت وقتها لمكتب من مكتاب خدمات المهاجرين الجدد … والموضوع مااخدش وقت وبسرعة كان الإقرار الضريبي بتاعي انتهى عن طريق برنامج في الكمبيوتر … انا وقتها كنت فاكر ان البرنامج ده خاص بالمنظمة اللي كنت فيها … لكني اكتشفت بعد كده ان البرامج دي عامة … وان مصلحة الضرائب بتحدد كذا برنامج كل سنة اللي الناس يقدروا يستخدموها في ملء إقراراتهم الضريبية …

ده فعلا اللي عملته بعد كده … إقراراتي الضريبية لأعوام 2013 و 2014 و2015 كلها تم تعبئتها وإرسالها عن طريق برنامج اسمه:
StudioTax for Windows
الموضوع كان مباشر وواضح ومافيهوش مشاكل … البرنامج نفسه أصلا بيقترح عليك شوية حاجات بعد ماتملى بياناتك .. وفرلي شوية فلوس حلوة البرنامج ده … وطبعا مجاني .. أصلي باموت في المجاني 🙂
السنة اللي فاتت جربت برنامج تاني … ولقيت الفرق بصراحة شاسع .. فرجعت لبرنامجي اللي انا متعود عليه

عموما .. بعد المقدمة الطويلة العريضة دي …. انا حبيت أفكر الجميع … موسم الضرائب ابتدا … ودي شوية حقائق عنه
– الموسم ابتدا من 20 فبراير 2017 ..
– آخر يوم لأغلبية الناس هو يوم 1 مايو 2017 “العادة يوم 30 إبريل .. بس السنة دي يوم 30 يوم أحد” ..
– الناس أصحاب الأعمال الحرة .. عندهم وقت لغاية 15 يونيو 2017
– قائمة البرامج المعتمدة موجودة في الصفحة دي
– أصحاب الدخل المحدود والمهاجرون الجدد ممكن يتواصلوا مع مكاتب خدمات المهاجرين ويطلبوا المساعدة … الحكاية محتاجة حجز وتسجيل
– اللي بيقدم إقراره الضريبي لأول مرة .. غالبا بيحتاج يبعته عن طريق البريد … بعد كده بتقدر تبعته مباشرة عن طريق البرامج المعتمدة إلكترونيا …

حقائق بخصوص الضرائب نفسها للناس اللي مش شغالة أعمال حرة أو contractors  …
– الشركة اللي انت بتشتغل فيها بتقتطع منك مبلغ الضرائب مع كل راتب بتستلمه ..
– الشركة عارفة دخلك الإجمالي كام وبتحسب ضرايبك بناء على كده … مالهاش دعوة إذا انت ليك دخل تاني او اذا كنت بتصرف فلوس في جهات أو مصارف معفية من الضرائب
– الإقرار الضريبي فرصة ليك إنك تحسب الضرائب بتاعتك بشكل أدق بعد ماتخصم كل المصاريف المعفية من الضرائب .. وغالبا بعد مابتقدم إقرارك الضريبي بيكون ليك فلوس عند الحكومة … بيبعتوها تاني ليك بعد مايعتمدوا إقرارك
– يعني .. لو بتاخد 60 ألف .. الشركة هتدفع للضرائب نيابة عنك ال 30% “20 ألف دولار” .. بفرض ان ده الرقم المستحق عليك … لكن لو انت صرفت طوال السنة مثلا 6 آلاف دولار في مصارف معفية من الضرائب “دراسة – علاج – مواصلات عامة – توفير للتقاعد … الخ الخ الخ” … فانت المفروض كان تدفع ضرائب على 54 ألف بس مش 60 ألف .. وبكده ال 6 آلاف المعفية دي اللي انت دفعت عليها 30% ضرائب “ألفين دولار يعني” هيرجعولك تاني …
– زي مابيقولوا هنا .. لو بتشتغل في مكان واحد بس .. وماعندكش دخل من أي مكان تاني … يبقى وفر فلوسك واعمل ضرايبك بنفسك …

كل ضرائب وانت بخير

هذه المقالة كُتبت في التصنيف الضرائب الكندية. أضف الرابط الدائم إلى المفضلة.

تعليق واحد على الضرائب الكندية … ياالدفع … ياالحبس .. وبلاش فهلوة

  1. سعيد النابهي كتب:

    هل الذي يحصل على الجنسية الكندية ويسافر خارج كندا للعمل هل اذا عمل في شركة بالخليج يلتزم بالضريبه على الراتب في كندا؟

    آمل منكم الافادة للأهمية وكيف يكون ذلك ..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.