تعديلات في نظام كفالة العائلة الكندي .. الزوج أو الزوجة

أحد بنود كفالة الزوجة او الزوج تم تغييره أو بالأحرى تم إلغاؤه …
قبل مااتكلم عن التغيير .. خليني اتكلم عن القانون نفسه ..
Family sponsorship … الكفالة العائلية
بيتيح القانون الكندي للمواطن الكندي او المقيم فرصة كفالة أفراد عائلته من الدرجة الأولى …
– الأب او الأم
– الأولاد تحت ال ١٨ سنة
– الزوجة او الزوج

النهاردة هنتكلم عن كفالة الزوج او الزوجة …
وهو حق مكفول لكل مواطن او مقيم … مادامت قد توفرت الشروط …
١- أن لا يكون مقدم الطلب هو نفسه قد حضر إلى كندا عن طريق نفس البرنامج .. يعني مايكونش هو نفسه كان مكفول … واذا كان حضر إلى كندا عن طريق الكفالة .. فلازم يعدي خمس سنوات على تواجده في كندا ليُسمح له بكفالة زوجته او زوجه

يعني ايه .. انا تزوجت وحدة كندية … عملتلي كفالة وجابتني كندا … بعد فترة الأمور مامشيتش بينا وتلخبطت وحصل انفصال … لادم يعدي خمس سنوات على تاريخ وجودي في كندا قبل مااقدر اقدم انا على كفالة زوجة لي .. وضحت؟

٢- لازم اكون قادر ماليا على مصاريفي انا بداية وبعدين على مصاريف الزوجة … يعني ماينفعش اكون عايش على المساعدات الحكومية واطلب كفالة زوجة …
ولو كنت قادر ماديا الان .. بس في الماضي اخذت مساعدات من الدولة .. لازم ارجعها كلها علشان اقدر اكفل حد جديد …

٣- طبعا لازم اكون مواطن صالح .. مافيش أحكام وبلاوي … معرفش بصراحة اللي عليه أحكام ايه النظام بالنسبة ليه

٤- طبعا ماينفعش تكون متزوج اصلا 🙂 هتتزوج اثنين هتروح ورى الشمس

٥- بعد كل ده .. لازم بقى تثبت للحكومة انكم فعلا متزوجين .. يعني انت مش مجرد كوبري لتقديم فرصة الهجرة لغيرك .. سواء بمقابل مادي او خلافه … او حتى مايكونش مضحوك عليك وبيتم استخدامك ككوبري وانت مش حاسس وواقع لشوشتك في الغرام الزائف 🙂

عدينا كل اللي فات ؟ أمورنا تمام؟؟ … بعد كده … مطلوب منك تعهد انك تصرف عليها لمدة ٣ سنوات .. سواء استمرت الحياة الزوجية بينكم او لا … انت مسؤول عن مصاريفها مسؤولية تامة .. ولو اخذت اي مبالغ من الدولة كإعانة ليها .. الدولة هتطالبك انت بيها … يعني خد بالك … ٣ سنوات مسؤولية تامة ..

في المقابل … مطلوب منها هي الاستمرار في العلاقة الزرجية بينكم لمدة سنتين علشان تقدر تحتفظ هي بعد كده على الإقامة الكندية ..
يعني لو توترت العلاقة بينكم بعد سنة من مجيئها … ممكن تبلغ انت عن انتهاء العلاقة … وهي ممكن تخسر إقامتها ويتم ترحيلها

الجزئية الأخيرة دي هي اللي تم تعديلها امبارح … الحكومة الليبرالية لغت شرط السنتين ده … مابقاش فيه شرط استمرار العلاقة لمدة سنتين على الشخص المكفول …

مبروك …

ملحوظة: ينطبق هذا القرار على الجميع 

هذه المقالة كُتبت في التصنيف قوانين الهجرة والجنسية. أضف الرابط الدائم إلى المفضلة.

6 تعليقات على: تعديلات في نظام كفالة العائلة الكندي .. الزوج أو الزوجة

  1. هانى كتب:

    معلش أما عندى سؤال بخصوص الاطفال المولودين فى كندا .. هل لو تم الطلاق او الانفصال بين الوالدين وعاد احد الطرفين الى بلده … هل من حق الطرف المتواجد فى كندا ان يطالب بإرجاع المولود الى كندا باعتبار أنه كندى المولد ؟
    ارجو الاجابة لو تكرمت
    شكرا

    • عبدالرحمن الطويل كتب:

      محتاج محامي يجاوب على سؤال زي ده

      اللي أعرفه انا .. ان الطفل الكندي ممنوع يطلع برة كندا الا بعد موافقة الوالدين .. حتى لو كانوا منفصلين

      لكن لو كان المولود برة فعلا .. ماعرفش الإجراءات ايه … عموما السفارة الكندية في البلد اللي هو فيها ممكن تفيد أفضل مني

  2. houssem كتب:

    اخي انا تحصلت على تأشيرة عقد عمل داخل كندا هل ممكن استقدام زوجتي وبعد كم شهر

  3. هدف كتب:

    السلام عليكم
    في حالة زواج كندي من عربيه ما هي الإجراءات حتى يستطيع جلبها الى كندا وكم المده حتى تستطيع المجيء الى كندا ولكم جزيل الشكر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *