الحداية مابتحدفش كتاكيت .. إنت اللي عليك العين …

في صباح أحد الأيام اللي مش هانساها … وانا في زحمة شغلي … تلقيت اتصالا هاتفيا …. احنا ماعرفش مين .. رشحك لينا فلان .. كان صديق عزيز علي .. واحنا حابين نعرض عليك خدمة متميزة …. عايزين نساعدك في التقديم على الهجرة العشوائية لأمريكا … هناخد بياناتك .. ونعمل ملف ليك .. ونقدملك كل سنة لمدة 10 سنوات …. وكل ده مقابل مبلغ مالي .. على ماأذكر كان أقل من 200 دولار أمريكي … لما رفضت … قالي احنا كمان بنبعتلك مجموعة سيديهات لتعلم لغتين من اختيارك .. لما دخلت اون لاين ودورت على السيديهات لقيت سعرهم في الحدود اللي طلبها …. فقلت لنفسي ماشي .. اعتبرني اشتريت السيديهات .. ونستفيد منها …. وحكاية أمريكا دي فوق البيعة …. وطبعا دي كانت حاجة غبية مني … فالسيديهات لغاية دلوقتي مرمية في الدولاب … ولا استفدت منهم ولو ب سنت واحد بس …. 

افتكرت الكلام ده لما سألني أحدهم عن شركة توظيف مقرها ساسكاتون … مالها الشركة دي .. الشركة دي تواصلت معاه وهو في الإمارات .. وماعندوش أصلا ملف هجرة لكندا … وعرضت عليه وظيفة في شركة كندية .. بمميزات خيالية … وقالتله احنا هنساعدك في كل الإجراءات للوصول إلى كندا من خلال المحامي بتاعنا .. ومافيش تكاليف عليك خالص … احنا بناخد فلوسنا من الشركة اللي هتوظفك .. مش منك … 

طبعا الكلام مغري جدا … هجرة لكندا وشغل كمان من أول يوم …. ده الناس بتدفع دم قلبها علشات تعمل لجوء .. فما بالك بالهجرة الطبيعية … فيه أحسن من كده … والجماعة واضح انهم مش نصابين … مش عايزين فلوس مني … يبقى أخاف من ايه .. هو كلمني بعد ماكان عمل مقابلة تليفونية معاهم … وكان موعده امبارح مع المقابلة التانية .. عبر السكايب … 

قلتله ابعتلي العرض بعد إذنك … لقيت العرض مبعوت من شركة مسمية نفسها .. Saskatchewan Recruiters

دخلت على موقعهم .. لقيت كلام كتير عن التوظيف والوظائف الموجودة … عملت بحث عن عنوانهم في جوجل .. لقيته موجود … ده في ساسكاتون عندنا .. جنب البيت .. عشر دقايق بالعربية …. لكني لاحظت حاجتين:
1- لما تشوف الصورة في جوجل .. ماتلاقيش اسم الشركة مكان العنوان المذكور .. هتلاقي حاجة تانية خالص … 
2- الموقع نفسه بتاعهم مش مكتوب فيه العنوان بشكل كامل .. مكتوب ساسكاتشوان ورمز بريدي وخلاص .. حاجة كدي زي لندن الدور الرابع 🙂 … 
كمان لاحظت في العرض ان المميزات خيالية … مغرية .. ومعمولة للناس اللي متعودة على نظام العمل في الخليج .. بدل سكن وبدل سفر وبدل مدارس … كلام كله مافيش منه هنا في كندا … 

قلت في نفسي بدل ماأقول للي سألني ان الناس دي واضح انها نصابة … وبما إن المكان جنبي .. خليني اروح اشوفه …. 
وده اللي لقيته … 

رحت اشوف الباب الأمامي علشان اتأكد أكتر وأكتر .. رغم ان الإسم زي مانتم شايفينه مالوش علاقة بالشركة المذكورة … وده اللي لقيته

في نفس الوقت كان صاحبنا بيعمل معاهم المقابلة على السكايب … وقالوله كما توقعت .. انت مش مطلوب منك حاجة … احنا هنتكفل بمصاريف نقلك وبيتك وسفرك …. انت بس محتاج تخلص ورقك .. وتتحمل تكاليف التصديقات والكلام ده … وطبعا المقصود بقى انه بعد مايتم تحويله للمحامي .. المحامي هيطلب منه مصاريف الحاجات دي …. وهي دي النصباية … كل الحكاية دي علشان المبلغ ده … وبعدها يسيبوك عايش على الوهم ومستني تذكرة الطيارة …. 

الحمد لله ان صاحبنا انتبه … وسأل …. غيره للأسف مابيسألش … وبيخاف من العين والحسد ومابيقولش لحد … وبيلبس لوحده في الخفاء كده .. ولا من شاف ولا من دري 🙂

هو نفسه قالي ان فيه ناس أصحابه قالوله انهم دفعوا في حاجة مشابهه مبلغ 1000 دولار ….

طبعا النهاردة لو دخلت على الموقع بتاعهم الاون لاين … مش هتلاقيه موجود … بيفكروني باللي كانوا زمان بيأجروا شقة مفروشة لزوم النصب … ويسيبوها بعد مايخلصوا من ضحيتهم … 

ياريت ناخد بالنا … زي ماقلت كده في العنوان ..

الحداية مابتحدفش كتاكيت … 

واللي مش فاهم المثل .. يدور على معناه 🙂

هذه المقالة كُتبت في التصنيف العمل في كندا, مواقف وطرائف. أضف الرابط الدائم إلى المفضلة.

2 تعليقين على: الحداية مابتحدفش كتاكيت .. إنت اللي عليك العين …

  1. osama.idc@gmail.com كتب:

    هو المكتب اسمه CE RECRUITERS ولما فتحت الموقع بتاعها اتضح انه موجود ونفس الأرقام اللي بيتكلموا عليا منها مايكروسوفت .وعلى أساس يجيبوا لي عقد عمل مع شركة اسمها كوليناس جروب وفعلا مطلبوش مني اي فلوس لما وصلت أوراقي المحامي ارسلي ورق الفورمات علشان تعبئتها وقالي هتدفع1000 دولار . بس امتى لسة ماكلمنيش لانه لازم المراسل الاوراق الاول

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.