خد بالك … طلب ال ATIP ممكن يأخر الملف بتاعك في إدارة الهجرة الكندية

وحشتونا ياجماعة .. أخباركم ايه … كان المفروض اني أكتب ليكم عن أكثر من حدث حصل معايا الفترة اللي فاتت .. لكن هنقول ايه بقى في الكسل …. 

اللي حصل معايا النهاردة خلاني أنفض غُبار الكسل عن مش عارف ايه واجيكم جري علشان أقوللكم عليه 

كنت من أسبوعين كتبت ليكم عن الطريقة اللي ممكن تحصل بيها على المعلومات الخاصة بملفك اللي موجود عند وزارة الهجرة والجنسية الكندية … رابط للموضوع
وبالفعل أنا كنت قدمت يومها على طلب للحصول على المعلومات الخاصة بملف الجنسية بتاعي … وباقي قدامي أسبوعين ان شاء الله لغاية ماتوصلني النتيجة … 

النهاردة قلت خليني أتصل برقم وزارة الهجرة والجنسية المجاني أسألهم كده عن حالة ملفي .. يمكن يرد علي حد كده طيوب ويديني معلومات أكتر عن حالة ملفي … وفعلا .. اتصلت وعرفت من خلال الموظفة اللي ردت إن نتيجة الحالة الأمنية بتاعتي وصلت خلاص … طيب تمام .. الحمد لله .. أخيرا … باقي ايه بقى .. قالتلي باقي بس انهم يبعتولك دعوة للإختبار بتاع الجنسية … خد بالك بقى من اللي جاي

قالتلي بما إني طلبت معلومات ملفي عن طريق ال ATIP … فده بيوقف حركة الملف بتاعي داخل وزارة الهجرة والجنسية .. لغاية مايوصلني التقرير اللي انا طلبته … وبعدها يعود ملفي للحركة من جديد … 

طبعا معلومة كانت صادمة بالنسبة لي … ماكنتش أعرفها .. ومااعرفش بصراحة مدى دقة المعلومة … لكن قلت أشارك المعلومة معاكم .. علشان تفكر وتحاول تتأكد من الكلام قبل ماتقدم طلبك

أنا فعلا كتبت تغريدة في صفحة وزارة الهجرة والجنسية بخصوص الموضوع ده .. ومستني الرد .. ده لو ردوا يعني 

الخبر الحلو في الموضوع … إن نتيجة الحالة الأمنية بتاعتي وصلت … وخلصنا من الموضوع ده …. باقيلنا الإختبار … والمقابلة اللي بعده واللي غالبا بتكون مهمة لو كان عندهم أي استفسار او شك بالنسبة لعدد الأيام اللي قضيتها في كندا

يامسهل

 

هذه المقالة كُتبت في التصنيف إجراءات الجنسية ومراحلها, إجراءات اللاندينج وما بعدها, إجراءات الهجرة ومراحلها, المستندات الكندية, قوانين الهجرة والجنسية. أضف الرابط الدائم إلى المفضلة.

6 تعليقات على: خد بالك … طلب ال ATIP ممكن يأخر الملف بتاعك في إدارة الهجرة الكندية

  1. mohmad alahmad كتب:

    السلام عليكم…صدق او لا تصدق اني افتح موقعك يوميا بدون مبالغة عشان اشوف آخر مقالاتك …اسلوبك بالكتابة بحبه جدا..بالاضافة الى اني اشعر انك تحب تنصح من قلبك وتفيد الناس بتجاربك …

    نخش عالسؤال ☺
    سؤالي متعلق بآخر سطرين من مقال اليوم ..
    ( والمقابلة اللي بعده واللي غالبا بتكون مهمة لو كان عندهم أي استفسار او شك بالنسبة لعدد الأيام اللي قضيتها في كندا)
    وبالتحديد بكلمة (لو )
    انا سبق وطرحت سؤال قريب عن تواريخ الخروج من كندا وهل كندا تعرف تواريخ الخروج من كندا وحضرتك حطيته على الفيس وكانت الاجوبة غير مقنعة بالنسبة الي لانه ما كنش فيها ادلة قاطعة عن معرفة كندا بتواريخ خروج اي مقيم فيها …وكلمة (لو ) اللي قلتها حضرتك اعادت السؤال للطرح من جديد..
    انا عاوز اثبات واحد واكيد وصريح عن ان كندا تعرف تواريخ خروج الناس منها…هم يعرفوا تواريخ الدخول مفيش نقاش وبالساعة وبالدقيقة..ومؤخرا اصبحوا بيعرفوا تواريخ الخروج لامريكا فقط…ولكن هل يعرفوا تواريخ الخروج للدول التانية…ولو يعرفوها بيطلبوا مننا لي تبيانها بملف الجنسية…وبيشكوا زي حضرتك ما قلت بالايام اللي قضيناها بكندا ليه …هم لازم ما يشكوش هم لو يعرفوا تواريخ الخروج بيكونوا متأكدين وميكونش فيه ( لو )…

    ارجو من رحابة صدرك انها ما تملش من طول سؤالي…
    السؤال ده محيرني من اكتر من 5 سنين ومش لاقيله اي اجابة لحد اليوم…واتمنى البعد عن الجواب الكلاسيكي اللي كل الناس بتقوله وهو ان كندا لو عايزة تعرف تواريخ خروجك هتعرف….طيب لما هم يعرفوا بيفوتونا بالمتاهة دي كلها لييييييييه ؟؟

    جزاك الله عني خير الجزاء لو كان عندك الاجابة اللي انا انتظرها من سنيين .

    واتمنى ماتطولش علينا تاني بمقالاتك الحلوة المفيدة

    • عبدالرحمن الطويل كتب:


      ربنا يسعدك على الكلام الجميل والتشجيع .. شكرا لك

      بالنسبة لسؤالك .. فلقد سألت عن عظيم 🙂
      انا ماعنديش اي معلومة أكيدة بخصوص الحكاية دي .. لكن من اللي بنقراه من اللي اتعمل معاهم مقابلات .. تحس من كلام الناس ان اللي كان بيقابلهم كان عنده معلومات .. لأن فيه حالات انقال ليها ان عندك اغلاط في مواعيد الأيام اللي انت كاتب انك طلعت فيها من كندا .. يوم اقل او يوم اكتر .. حاجة زي كده ..
      عموما لما اروح انا ان شاء الله لمقابلتي هاسألهم السؤال ده

      منورني دائما

  2. mohmad alahmad كتب:

    مشكور جدا على الرد….
    وان كان الرد ما اروى ظمأي ?

    يارب يوفقك بمقابلتك يا رب…
    انت فعلا راح تسألهم هالسؤال ??
    مابتوقع بيجاوبوك …
    عموما لو عملتها راح اعطيك جائزة نوبل لاشجع عربي مسلم في كندا?

    هي مقابلتك ايمتى بالمناسبة ؟

    • عبدالرحمن الطويل كتب:


      طيب خد الحقيقة دي …
      تواريخ الدخول والخروج برا تقدر تطلبها بنفسك عن طريق ال ATIP …
      الحالات اللي كنت قلت انا عنها وتم التنبيه على أصحابها بزيادة يوم او نقصان يوم … كانت كلها حالات برية

      مافيش حاجة وصلتني لسة بتدل على وجود تقرير مماثل للسفر عن طريق المطار …

  3. mohmad alahmad كتب:

    هو انا اسف لو تقلت عليك..
    لكن ياريت والله ياريت..لو تنزل سؤالي على الفيس…لكن باسلوبك الجميل اكيد…وتعيد صياغته بطريقتك الرائعة في الكتابة..
    اكونلك من الشاكرين

    • عبدالرحمن الطويل كتب:


      لسة ماتحددتش المقابلة … ان شاء الله قريبا توصلني الدعوة ليها …
      بالنسبة للسؤال .. فصدقني ماهتلاقي حد عنده اجابة واضحة وشافية … معلومة مش متوفرة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.