الجزء الثاني … يوم الإمتحان .. يُكرم المرء أو …… امتحان الجنسية الكندية

في الجزء الأول تكلمت معاكم عن معلوماتي بخصوص التحضير لإمتحان الجنسية .. في الجزء ده هاتكلم عن ايه اللي بيحصل في يوم الإمتحان من خلال اطلاعي على تجارب البعض في مختلف مواقع النت … ومن خلال الأصدقاء اللي مرّوا بنفس التجربة …

الدعوة اللي بتوصلك للإمتحان بيكون فيها وقت الإمتحان ومكانه …. ياريت طبعا توصل بدري .. نص ساعة على الأقل .. .

زي ماقلنا في الجزء الأول .. هتروح ومعاك كل الأوراق والأصول … ومن ضمنها اثباتاتك الشخصية .. لو معاك أطفال ماحدش هياخد باله منهم … فلو رحت ومعاك أطفال .. فلازم يكون في حد معاك يقدر ياخد باله منهم .. الأطفال يعني اي حد عمره أقل من 12 سنة …
بعد ماتوصل … وتشوف القاعة اللي هتمتحن فيها …. وتاخد مكانك … هيوزعوا عليكم ورق الإمتحان … 20 سؤال … اختار الإجابة الصحيحة … وليك نص ساعة تخلص فيها …. وكل واحد بياخد نموذج غير اللي جنبه … فبلاش حركات الإستعانة بصديق دي 🙂 … لازم تجاوب 15 سؤال صح علشان تعدي

بعد ماتخلص امتحانك وتسلم ورقتك … فيه لجان بتطلب منك الإنتظار لغاية ماالكل يخلص امتحانه … وفي لجان بتخليك تطلع وتروح لمكان اللقاءات …. الانتريفيو يعني ..

الهدف الأساسي من الانترفيو ان الموظف يتحقق من أصول الأوراق اللي انت بعتها مع طلبك .. جوازات السفر .. شهادات الميلاد … كرت الإقامة .. كرت الصحة … رخصة القيادة … كل الأوراق اللي انت بعتها مع الطلب … هيطلبهم منك وثيقة وثيقة …
اللي بيحصل بعد كده بيختلف من شخص لآخر … وكله حسب الورق اللي انت قدمته والمعلومات اللي انت قدمتها … لو كلامك مش متناقض ومعلوماتك ماأثرتش أي شك … الموضوع ممكن ينتهي عند الحد ده … وممكن جدا يديلك الدعوة لحضور القسم في ايدك قبل ماتمشي …
لكن لو كانت المعلومات متضاربة … او نسيت مثلا رحلة من الرحلات اللي انت قمت بيها خلال الفترة اللي عليها العين “ال 6 سنوات الأخيرة حسب القانون الحالي … و ال 5 سنوات الأخيرة حسب القانون الجديد اللي هيتم تطبيقه في الخريف” .. أي حاجة مش مريحة في ملفك … هتلاقي موظف الهجرة مجهز كده مجموعة من الأسئلة ليك … وعايز اجابة شافية عليهم …. وممكن الإجابة تكون عبارة عن الأختام الخاصة بالرحلة اللي انت قمت بيها … او تكون عن أي حاجة تانية … خيالهم ممكن يكون واسع لأبعد حد …
فيه ناس شافوا صفحات الجواز بتاعهم صفحة صفحة … واتسألوا عن معظم الأختام اللي فيه …. وفيه ناس انطلب منهم بعد اللقاء انهم يترجموا جواز سفرهم صفحة صفحة … ويبعتوا الترجمة ليهم …..

أسوأ حاجة ممكن تحصل … وربنا يبعد الكلام ده عننا كلنا … ان الموظف مايقتنعش بإجاباتك ..أو يحس من كلامك كده انك مش على بعضك .. وكإنك مخبي حاجة ….. وده طبعا بيخليه يريح راسه ويطلب منك ما يسمى ب CANADIAN CITIZENSHIP RESIDENCE QUESTIONNAIRE (RQ) .. وده عبارة عن استبيان كامل بتملى فيه بالوثائق كل يوم في كندا قضيته فين وازاي … حاجة مملة … وبتاخد وقت ومصاريف … والكل بيتمنى انه مايعديش بالتجربة دي … ويارب ماتحصل لأي حد منكم … 

المهم … في نهاية اللقاء بيقولك الخطوة الجاية ايه … سواء لو لسة ليه طلبات تانية عايزك تبعتها ليهم … او هيقولك امتى تتوقع رد منهم … بعض الناس بيتقال ليهم انتظر رد خلال أسابيع قليلة .. وبعضهم بتوصل ل 6 شهور … والله أعلم المعايير بتكون ايه … 

آخر حاجة هاقولها .. لو كنتم أكثر من واحد مقدمين على الجنسية مع بعض … هتاخدوا الإمتحان مع بعض … في نفس القاعة يعني … والانتريفيو هتكونوا مع بعض .. بس كل واحد يتسأل لوحده .. وغالبا ماحدش بيجاوب عن حد … 

بعد ماتخلص كل ده .. تطلع بقى وتروح بيتك وتتفاءل خير 🙂

بالتوفيق للجميع

هذه المقالة كُتبت في التصنيف إجراءات الجنسية ومراحلها. أضف الرابط الدائم إلى المفضلة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.