إجراءات الدخول إلى كندا للمرة الأولى


الواحد لو هيحكم على الأمور هيقول يفتح الله مش عايز 🙂

طيب … نحكي اللي حصل معانا ….

في الطيارة وزعوا علينا زي ماتقولوا كده كرت الدخول …. كل اربعة أشخاص في كرت بشرط يكونوا هيكتبوا نفس العنوان …
اخدت كرتين علشان احنا خمسة
كتبت فيه اسامينا وتاريخ ميلاد كل واحد فينا … وجنسيتنا … كتبت فيه العنوان اللي اخدته من اليو بي اس … بعدين جاوبت على كام سؤال موجودين فيهم

نزلنا من الطيارة. …. اول ماطلعنا من الباب كان فيه ضباط جوازات بيشيكوا على اوراقنا … فتحتلها صفحة الفيزا رحبت بينا وقالت ياهلا وياسهلا

تحركنا بعدها الى جوازات المطار … شاب ظريف اخذ الجوازات وكرتين الدخول .. دخل البيانات عنده وسألني أعتقد من باب الفضول … مهاجر كندا ليه … قلتله علشان الاولاد والتعليم …
شاف العنوان فسألني ده عنوانك الدائم والا عنوان صديق والا مشتريه … قلتله مشتريه
خلص بياناته واعطاني كرتين الدخول والجوازات … وقالي روح على مكتب الهجرة …

المكتب جنبه فرحتله مع الاولاد واستنيت في الطابور … اقل من عشرة اللي كانوا موجودين … وقدامنا مجموعة من الكاونترات … لما وصل علي الدور ورحتله وشاف كرتين الدخول من بعيد قالي انت مهاجر ادخل جوة على المكاتب اللي جوة … دخلت لقيت موظفين اتنين ومعاهم مهاجرين زيي وانا التالت … بسرعة وصل الدور علينا …

دخلت انا والمدام … طلب الجوازات والورق المكربن .. راجع البيانات اللي في الورق بالمعلومات اللي في الجواز لكل واحد مننا .. مضيت اربع توقيعات على ورقتي و 3 توقيعات على كل ورقة من الاولاد … والمدام مضت 3 توقيعات على ورقتها
اداني نسخة لكل واحد مننا وطلب صورتين لكل واحد مننا ماعدا بنتي الكبيرة رهف … بيقول صورتها اللي في الورق كويسة ومش عليها حبر زي البقية … اديته الصور واداني كرتين الدخول والجوازات ومن غير ابتسامة قالي يالا تطلع من الباب اللي هناك علشان تاخد شنطك …

بس كده … ايوة بس … وورق البي ار تبعك هيوصلك في خلال 4 الى 6 اسابيع على العنوان بتاعك …

سألته عن قائمة العفش مش عايزها .. قالي مش انا … بعد ماتاخد شنطك هتلاقيهكم مستنيينك هناك …

اخدت الورق وطلعت من عنده الى باب الخروج اللي قالي عليه لقيت راجل كبير ومعاه ست مبتسمة بيرحبوا بينا وابتسامة جميلة وادونا شنطة فيها كل المعلومات اللي شايفينها ضرورية لينا في بلدنا كندا … وبابتسامة حلوة ودعونا … طلعنا لقينا شنطنا على الأرض مستنيانا … روحت اجيب عربية اشيل فيها الشنط لقيت ماكينة الدفع اشتغلت … العربية ب ٢ دولار …

اخدت عربيتين وحطيت فيها الشنط … وتوكلنا على الله الى الجمارك … كانت سيدة مبتسمة واستقبلتنا بترحاب وسألت هو ده عفشكم والا فيه تاني جاي بعدين … رحت مطلعلها الورق اللي انا مزبطه تماما زي ماقريت في إحدى مواقع النت … وطلعتلها النسختين اللي انا مجهزهم … انبسطت جدا لما شافتهم وقالتلي كده انت ريحتنا … مسكت القوائم اللي انا كنت كاتبها في جداول وراجعتهم بشكل عام … تعمدت اديها القوائم من غير صور الذهب اشوف كده هتسأل عنهم والا لأ … كنت حاطتها اخر ورقة … اول ماشافة الورقة قالت فين الصور … طلعت النسختين اللي معايا … طبعا كانت طايرة من الفرح من الاستعداد بتاعنا … اخدت النسختين من غير حتى ماتسأل عن قائمة الحاجات اللي معانا … اللي انا اصلا كنت عامل حسابي وكاتب كل حاجة في القائمة اللي هتيجي بعدين حتى لو كانت معانا … لأني راجع تاني وهاخدهم معايا …

المهم اخدت النسختين ختمتهم ورجعت نسخة لي معاها ورقة مطبوعة من الكمبيوتر فيها بياناتي …

وفي أمان الله

طلعنا اخدنا تاكسي … ٥٦ دولار وصلنا بيهم للفندق …. وسلامتكم

بكده تنتهي حكاية أول يوم في المجهووووول

Facebook Comments
It's only fair to share...Share on FacebookShare on Google+Tweet about this on TwitterShare on LinkedIn
هذه المقالة كُتبت في التصنيف إجراءات اللاندينج وما بعدها. أضف الرابط الدائم إلى المفضلة.

4 تعليقات على: إجراءات الدخول إلى كندا للمرة الأولى

  1. samah كتب:

    حضرتك اشتريت بيت من قبل ماتعرف انت هتستقر فين والا كنت خلاص رتبت شغل
    وتقصد بالعفش ايه هو ينفع اشحن عفشي انا كنت بفتكرالموضوع مكلف جدا

    • عبدالرحمن الطويل كتب:


      بالنسبة للبيت .. لا ماحصلش

      العفش ممكن تشحنيه لو عايزة … فيه ناس بتعمل كده .. ماعنديش فكرة بصراحة عن تكاليف الحكاية دي .. بس انا ماعملتهاش ومافضلتش اني اعملها

      • samah كتب:

        انااسفه لازعاج حضرتك بس ياريت توضح اومال ايه اللي حضرتك تفصده بقوائم العفش؟كمان حضرتك جاوبت الاوفيسر ان البيت مشتريه فاالنقطه دي مش واضحه بالنسبه لي
        وياريت لو اللينك اللي ساعدك في التجهيزات موجود تشيره هنا ممكن يساعدنى اكون شاكره لسيادتك مع جزيل الشكر

        • عبدالرحمن الطويل كتب:


          ولا يهمك .. مافيش إزعاج أبدا …

          أنا قصدي العنوان هو اللي مشتريه .. مش البيت … ممكن تشتري عنوان مراسلات في كندا عن طريق ال UPS … وتستخدميه للمراسلات لغاية مايبقى عندك عنوان سكن دائم تستلمي المراسلات عليه …

          بالنسبة للتجهيزات … يارب يفيدك الموضوع ده
          http://www.abdutaweel.com/english/?p=228

          وكمان عندك على الشمال في التصنيفات … فيه قسم خاص ل “ماقبل اللاندينج” سجلت فيه كل اللي عملته قبل رحلة اللاندينج …. يارب تلاقي فيه حاجة مفيدة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *