من الأسئلة اللي اتسألتها كثيرا ... ليه ساسكتون يعني ؟؟؟

هانقل ليكم هنا اللي انا كتبته وقتها ...

=============

طيب … نتكلم بقى عن رحلة الانتقال من تورونتو الى ساسكاتون …


أرجع من البداية …. من أول مكالمة وصلتني علشان الوظيفة …
وانا محتار … ياترى هاسيب تورونتو بعد ماتعودنا عليها خلاص … وجوها لطيف … بيقولوا السنة دي كان أصعب شتا يمر عليها .. يعني ياسلام على هيك شتا زي مابيحكوا
مش حاجة صعبة قوي يعني … فإيه اللي يخليني أسيبها … خصوصا ان احنا اتعرفنا على ناس أفاضل كتير … والأولاد حبوا المدارس … وبقالهم أصحاب فيها ….
ليه نسيب ده كله ونمشي برة تورونتو ….


لكن كعادتي … مافيش قرار باخده قبل ماتكون الحاجة في ايدي …
فقررت أكمل في اجراءات التقديم .. على أساس لو حصل وربنا وفق أفكر وقتها ….


لما وصل عرض العمل بفضل الله … وحان وقت التفكير … كان أمامي أكثر من طريق
أسيبهم في تورونتو … واروح انا اشوف رزقي … واجيهم كل شهر مرة مثلا … يعني غربة وفرقة جو الغربة اللي احنا فيها
أو
آخدهم معايا من أول يوم …. واللي يجرى علي يجرى عليهم … المهم مانفترقش …
أو
أروح أنا الأول … أشوف سكن … وبعدين أرجع آخدهم …
أو
أروح أنا الأول … أقعد لوحدي لغاية مايخلصوا المدارس .. وممكن جدا ينزلوا مصر في الصيف … ويرجعوا هنا على خير مع بداية سبتمبر … تكون الدنيا هنا وضحت ظروفها ايه بالنسبة لي ..
أو
آخر حاجة بقى إني أرفض العرض .. واستنى في تورونتو … خصوصا انو كان في شركتين كمان مكلميني على فرص عمل .. الله أعلم يمكن تسلك الأمور .. وحدة منهم كانت في تورونتو …


طبعا أول اختيارين كانوا صعبين جدا فتم الغاءهم من التفكير …
وآخر خيار تم الغاؤه عملا بالمثل القائل .. عصفور في اليد …
وكمان لأني ارتحت فعلا للناس في الشركة دي … والتجربة فيها صحيح انها في نفس المجال … لكن فيها خبرة جديدة جدا لي … فقلت فرصة أتعلمها للمستقبل كمان


باقي أمامي اختيارين … أنا فيهم الان ..
أروح أنا الأول … أشوف سكن … وبعدين أرجع آخدهم …
أو
أروح أنا الأول … أقعد لوحدي لغاية مايخلصوا المدارس .. وممكن جدا ينزلوا مصر في الصيف … ويرجعوا هنا على خير مع بداية سبتمبر … تكون الدنيا هنا وضحت ظروفها ايه بالنسبة لي ..


ربنا يوفقنا للي فيه الخير …